Aizawl | January 18, 2021: Subedar K. Laldingliana, 42 Rastriya Rifles (Assam Regiment) chu Inrinni (January 16) khan, New Delhi-ah India sipai huaisen chawimawina Sena Medal hlan a ni.
Subedar K. Laldingliana hi kum 1980 December ni 12 khan Pu K. Khuangzika (L) leh Pi Vanlallawmi te inkarah, Champhai Kahrawt Pialral Veng-ah lo piangin, zirna lamah BA thleng a zir a, amah hi infiammi, infiamna lam ti thei vek, abik takin Football khel thiam (midfielder) niin Champhai leh Mizoram aiawh mai bakah Meghalaya leh India ram aiawhin Football khelin ramchhung leh rampawnah a lo fehchhuak tawh a ni.
Kum 1996 khan Mizoram Junior team ah telin, National Championship a khel tawh a, Aizawl ah First Division League ah Kulikawn FC, Venghlui FC leh Dawrpui Vengthar FC tan lo khel tawhin, North East Sports Festival Mizoram in a thlen ṭum leh Nagaland, Kohima a neih ṭumin Mizoram team a lo Champion pui tawh a, Kohima ah hian Mizoram team Captain a ni nghe nghe. 2001 ah Mizoram Junior team aiawhin Meghalaya Invitation Cup khelin, Shillong ah an kal a, hetah hian team Captain niin, Final.ah India Junior Team an hneh lo hlauh a. Mahse, Sipai a a luhna kawngka inhawnna niin, heta ṭang hian Assam Regiment Centre (ARC) Football team ten an sawmna angin ARC ah a khel ta a, ARC a awm lai.hian Mizoram tan National Senior Santosh Trophy tum 2 a khel a, Mizoram aiawh mai ni lovin, Meghalaya aiawhin National Games, Guwahati ah a khel a, Bronze Medal an dawng a. Kum 2010 khan I-League Club Shillong Lajong tan a khel tawh a, hemi kum hian South Asian Army Sports Meet - Katmandu, Nepal ah Indian Army hmingin a kal a, Yangoon, Burma ah Indian Army aiawhin a inkhel bawk a, kum 2008-2012 chhung hian Services Team ( Army, Navy leh Air Foce a football thiam zualte awmkhawmna) ah a khel bawk a ni.
Sipai a ṭan chhung hian India ram hmun hrang hrangah post a ni tawh a. Ṭha tak leh rinawm taka sipai hna hi thawkin, hnathawkṭhate chawimawina Commendation Card, GOC in C 101 Area aṭang leh Eastern Comman, Commander aṭangin a dawng tawh.
Kum 2017-2020 chhungin 22 Rastriya Rifles ah posting in a awm a, (tunah hian 9 Assam Battalion ah a awm mek a ni). RASTRYIA RIFLES a awm lai kum 2019 October ni 22 khan Jamu and Kashmir a Rajpora Operation ah Subedar K. Laldingliana leh a hote mi chu India ram chawkbuaitu hel, firfiak huaisar te nen inpawmchilhin, an inkap a, Subedar K. Laldingliana leh a hote chuan firfiak te hi an that/dahṭha vek a.
Hetianga India ram leh hnam, mipui chhan nan huaisen taka a chetna avang hian India Sipai huaisen mi tlem te in an dawn ṭhin SENA MEDAL chu nimin Inrinni khan Subedar K. Laldingliana hnenah hian Chief of Army Staff General MM Navarane chuan New Delhi-ah a hlan ta a ni.
Subedar K. Laldingliana hi kum 2005 khan Lalhmangaihtluangi d/o C. Sangṭhuama Champhai Kahrawt Veng nen inneiin, tunah hian fa 4 neiin, Champhai Kahrawt Pialral Vengah an khawsa mek a ni.
- Liantluanga Renthlei
Editor, Vantawng, Thenzawl(He thuziaktu hi naupan lai aṭanga a ṭhianpa a ni. Sipai Huaisen Chawimawina dawngtu Pu K. Laldingliana hi Mizoram Sorkar a Minister of State Pu T.J. Lalnuntluanga nen hian Unau (first cousin) an ni.)
Post a Comment
He post chungchanga i ngaihdan lo sawi ve rawh: