Chief Secretary-in ACB Officer te tan intuaihriamna buatsaih hawng

Aizawl | January 18, 2021: Mizoram Chief Secretary Lalnunmawia Chuaungo, Chief Vigilance Officer (CVO) ni bawk chuan vawiin khan Anti Corruption Bureau (ACB) Office Conference Hall-ah ACB a thawk Investigating Officer te tana kar khat intuaihriamna Refresher Course, Vigilance Department leh ACB tangkawp ten an buatsaih a hawng.

Chief Vigilance Officer Pu Lalnunmawia Chuaungo chuan hlemhletna corruption chu thil thar a nih loh thu te, mihring ten tun hma atanga kan chenpui reng a nih thu te, mahse chuti chungin engti zawng maha sawimawi emaw, sawi nep chi emaw a nih loh thu te a sawi, a hluar zel loh nan, hmalak erawh kan tih makmawh theuh a ni, a ti. Ram rethei leh mipuite rah behna a nasatna ramah zel hlemhletna a hluar emaw tiin a sawi theih thin a, chutiang ramah chuan hmasawnna a thuanawp a, mipui te chan tur mi tlemte in an insem a. Dan felfai neih loh te, kalphung leh system neih that loh avangtein hlemhletna hi a tipung thei niin a sawi.

Chief Secretary chuan ACB hi mipui thatna leh an hlawkna public welfare leh public interest atan thawk nia a hriat thusawiin ACB in pawimawhna lian tak a nei a ni, a ti a. Mizoramin Lok Ayukta kan neih chinah ACB nen hnai takin kan thawk ho a, Lok Ayukta hnenah ACB in case engemaw zat a transfer tawh a, hun lo kal zelah pawh kan inlaichinna leh kan thawhhona hi a phuisui zel kan beisei a ti. Refresher Course chu Investigating Officer ten an hlawkpui leh an tangkaipui ngei a beisei thu sawiin khawvel danglam mekah sualna pawh a danglam chho ve zel a, sum lamah inbumna te, IT hmansualna te a hluar cho mek a, hengte pawh hi Investigating Officer an nih angin an hriat zel leh an mahni pawh hetiang lamah an in intuaihriam a pawimawh a ni, a ti.

Intuaihriamna hawnna hi Pi Zothantluangi, Deputy Secretary, Vigilance Department in kaihruaiin kar khat chhunga hun an hman dan tur leh an zir tur tlangpui a sawi a. Pu Dingluaia, Director, ACB pawhin thu sawina hun a nei bawk a ni.

Investigating Officer te tan intuaihriamna ah hian Dr. Vanlalthlana, MLA leh Mizoram Police leh Department hrang hrang atanga mithiam rual mi 10 zetin kar khat chung zirtirna an pe dawn a ni.

- DIPR