Aizawl | January 30, 2021: Sports Minister Pu Robert Romawia Royte chuan nimin khan FIFA tanpuina hmanga MFA Football Astro Turf Ground, Sairang Dinthar hmuna siam mek chu a hmunah a tlawh a, MFA hotuten minister hi an tawiawm a ni.
Minister hian Field kianga hostel sak mek pawh a hmunah a en fiah a. MFA hotute chuan Sairang Dinthar khelmuala phullem phah hna kalpui mek chu Covid hripuiin ti khaihlak hret mah se, kar khat chhunga zawh fel mai an beisei thu leh he ground atan hian Dressing Room leh Field kawng siam a tul thu te Minister hnenah an lo thlen a ni.
Minister leh MFA hotute chuan Lengpui Astroturf Football Ground siam mek pawh vawiin chuan an tlawh bawk a. He hna thawktu Contractor, Decor India Site Engineer pawh a lo thleng tawh a, kumin April-ah chuan zawh fel an beisei tih a sawi a. Decor Company ten Kolosib Saidan Field an siam zawh thar chu nimin piah ah FIFA Engineer ten Test an nei tawh a, FIFA Test a tlin ngei an beisei a ni.
Minister Pu Roberta chuan phullem phah chu a tha leh tha lo a inthlauh thei hle tih sawiin FIFA Test ngam leh paltlang zo tur zel hman a tha a tih thu a tarlang a. Sports Department in state budget pawn lam atanga sum a hmuh hmanga Mizoram hmun hrang hranga hna a thawhna atangin Mizoram Sorkarin chhiah sum thahnem tak a la lut mek a. Infrastructure tha Mizoramin a neih piah lamah sumfaiin Sorkar leh mipuiin Sports hmasawnna ruhrel siam hi an hlawkpui mek a ni a ti.
Post a Comment
He post chungchanga i ngaihdan lo sawi ve rawh: