National Kala Utsav Indigenous Toys & Games-ah Mizoram pahnihna

Aizawl | January 30, 2021: Kumtina hnam zia rang hmanga zirlaite intihsiakna Sawrkar Laipui, Ministry of Education hnuaia Department of School Education & Literacy-in a buatsaih National Kala Utsav result tihchhuahah Indigenous Toys & Games ihtihsiaknaah, Mipa category ah Mizoram chu pahnihna a ni.

Indigenous Toys & Games-ah hian Thangchungnunga Ramlaitui RMSA Secondary School Lunglei District chu Mizoram aiawhin a chhuak a, Kalchhet a entir a, hun tiam chhungin kalchhet atana a rahbi Mautlawna tawnbeh atangin a tan a, phawiban, khen kal, tlan leh zuan te a entir a ni. India ram puma zirlaite intihsiaknaah he game-ah hian pahnihna a ni ta a ni.

National Kala Utsav January 11-22, 2021  chhunga neihah hian state  leh UT  tin  aiawhte an chhuak a, item tinah mipa leh hmeichhia an intihsiak a, mahni hnam zia rang theuh pho chhuah nan hman a ni a, infiamna lamah pawh mahni hnam theuh infiamna entir a ni. Kum dangah chuan National Kala Utsav hi a huhovin hlim taka hman thin a ni a. State leh UT atanga zirlai thlan chhuahte kalkhawmin mahni hnam zia rang hmangin an intihsiak thin a ni. Kuminah erawh chuan Covid-19 hrileng avangin hmun khatah a huhovin hman theih a ni lova, mahni awmna state theuh atangin online-a hman a ni.

Kumin National Kala Utsav-ah hian Intihsiakna hi chi hrang hrang 9 ah zirlaite hi an in el a ni.  Intihsiakna tinah hian state leh UT atangin mipa leh hmeichhia pakhat ve ve zel an chhuak a, mipa leh hmeichhia hi a hrangin an in el zel a ni.  Mizoram atanga chhuak te hi District hrang hrang atanga naupang thlan chhuah te an ni.

- DIPR