Mos K Lalrinliana'n Zophai tlawhin ramri hmasawn nana hmalak dan endik

Kolasib | January 30, 2021: Minister of State, Food, Civil Supplies and Consumer Affairs Department leh Kolasib bialtu MLA ni bawk Pu. K.Lalrinliana chuan IR Post, Zophai tlawhin ramri tih hmasawn nana hmalak dan tur a endik a, NH 154 atanga Zophai IR duty post inkalpawhna tur metre 14.5 a thui minor bridge sak mek chu a endik bawk.




IR Post, Zophai a tlawhnaah hian thawktute kawmin Mizoram mi leh sa, leilet neituten thlamuang tak a an leilet an enkawl chhunzawm zel theih nan patrolling uar lehzual a kalpui turin a chah a, ceiling fan leh cooler an mamawh thu an lo thlen angin a leina tur cheng 30,000 a pe a, thil dang tul a hman tur cheng 10,000 a hlan nghal bawk a ni. Minister chuan IR Post, Zophai chu ramri hnaia awmte thlamuantu an nih angin an veivahna turin lirthei an kawl ngei a tul thu a sawi a, hemi tur hian a tul anga hma a lak tur thu a sawi bawk a ni.

Minister chuan Mizoram sawrkarin ramri tih hmasawn a nih theih nan ruahmanna hrang hrang siam a nih thu a sawi a, IR Post, Zophai leh Assam Police Outpost, Golachhera inkara leilet awmte chu a hmunah kalin a endik a, ramri tih hmasawn nana hmalakna hmasa atan Agriculture link road kalna tur leh ‘Ramri lui’, Bairabi thleng a eng chhitna kaltir dan tur a endik nghal bawk a ni. Electric line kaltir dan tur hi Minister hian P&E Department a thawktute nen ruahmanna siam a nih tawh thu a sawi a, hun reilote chhungin hma lak tan tum a nih thu a sawi.

Boruak muanawm tak kar a ramri bul hnai tih hmasawnna hna kalpui a nih theih nan ramri bul district a DC leh SP theuh ten indawrtawnna an nei thin a ni.
Minister Pu.K.Lalrinliana hi Dr.H.Lalthlangliana, Deputy Commissioner, Pu. Vanlalfaka Ralte, SP, Pu HP Zothankhuma, EE, PWD Kolasib Division leh Bairabi khawtlang hruaituten an tawiawm a ni.

- DIPR

Post a Comment

0 Comments