Serchhip DC-in sikul chhawmdawl tura inzirtirna - Adopt a School hawng

Aizawl | January 28, 2021: Serchhip Deputy Commissioner Pu Kumar Abhishek ruahmannaa duan sikul chhawmdawl tura inzirtirna- Adopt a School chu nimin khan hawn a ni a, 

He hunah hian Pu Kumar Abhishek chuan, he ruahmanna kalpui tura a ngaihpawimawh zual tarlangin mipuiten an khuaa sawrkar sikulte chu tun aia neitu thinlung pu zuala, mahni ta a nih anga a tulna apianga chhawmdawl leh tanpuia, ngaihven leh zual nan te, district chhunga zirna dinhmun tha zawk an neih theih nante leh hmanrua leh sikul mamawh zualpuite phak ang tawka an inngaihtuahpui zel theih na tur te a ni a, a vawi khatna atana Sikul Chhawmtu tur Officer te chu an Sikul thlan tlawh nguna, vil uluka an theihna apianga tanpui tlat turin a chah a ni. 

DC hian sum awmsa engmah a awm chuang lova nimahsela a theih chen chenah convergence te dap a ni ang a ti a, Corporate Social Responsibility sum te pawh dap theihna tur chi a awm chuan dap a ni ang, tih sawiin kalpui dan tur thenkhat a tarlang a, sikul tihhmasawn nan pawisa a pawimawh ber lo theia, thawktute leh naupang leh khawtlang inpekna ten nasa takin thil a thlak danglam thei a ni, a ti.

Addl DC Pu Lalmuansanga Ralte chuan he ruahmanna hi Central emaw State sum emaw hmanga kalpui nilovin Serchhip District Administration in a hnuaia Office peng hrang hrangte nena tangruala an kalpui tur a ni a ti a. A vawi khatna atan kumin Academic Year ah hian Pilot Project angin Serchhip SDO Sadar Office, Thenzawl SDO Office,  N. Vanlaiphai SDO Office, Serchhip BDO Office leh E. Lungdar BDO Office ten an bial chhunga Sikul an chhawm tur pakhat theuh an thlang anga, chung an sikul thlan te chu kumkhat atan he programme kalpui dan tur duan sa angin a theihna kawng kawngah an tanpuiin an chhawm dawn a ni.

A tum khatna atan hian Serchhip SDO Sadar chuan Bungtlang M/S a chhawmdawl ang a, Thenzawl SDO Office in Govt. Thenzawl H/S, N. Vanlaiphai SDO Office in Govt. Oriental M/S, Serchhip BDO Office in Khumtung P/S leh E. Lungdar BDO Office in E Lungdar P/S II te an chhawm dawn a ni.

- AIR Aizawl