February thla chhunga Zokhawsanga pem vek turin Assam Rifles nawr

AIzawl | January 28, 2021: Chief Minister Pu Zoramthanga’n thla thar February thla chhunga Zokhawsanga pem vek turin Assam Rifles an nawr tih a sawi.

Vawiina AMC Ward No. IV MNF Campaign hawnna leh Manifesto tlangzarhnaah he thu hi sawiin Chief Minister chuan, Assam Rifles te chu thla thar February chhunga Zokhawsanga pem vek turin an nawr a, tunah hian za rual vel an insawn tawh a ti a; AR hotute pawhin phei an duh tawh hle a, an inbuatsaih mek a ti.

Hetihlai hian Sorkar lam pawh an inbuatsaih mek a, Aizawl mai ni lo, Mizoram hmun danga sipaite pawh umchhuah vek an tum a ti a. Hei hi Prime Minister leh Union Home Minister pawh a sawipui tawh thu a sawi bawk.

MNF President Pu Zoramthanga chuan an sorkar hnuah MP inthlan neih a ni a, election code of conduct-in rei tak a phuar a. A hnuah Covid-19 a lo lang leh a, an sorkarin hna a thawh tak tak chu thla riat chauh a la nia a hriat thu a sawi.

Hetihlai hian Zoram People’s Movement party Thalai Pawl chuan SEDP Cheng Nuai 3 sem tura insawi leh CAB dodal tur anga insawi MNF Party chuan AMC inthlan dawnah ‘lungphum politics’ an rawn hmatheh tiin vawiin khan thuchhuah an siam.

ZPM Thalai chuan an thuchhuahah he thu hi sawiin, Chief Minister Pu Zoramthanga leh Sports Minister Pu Robert Romawia Royte chu a phusa ber pawl an ni a, an ze ngai chhuahin inthlan dawnah namen lovin an intiam leh ta, an ti a. Hetianga inthlan dawna hmalakna hi Voter-te hmusitnaa an ngaih tawh thu an sawi. 

Vawiin vek khan AMC inthlan neih chhoh meka Ward No. 7 inbuatsaih dan leh hmalak zel dan tur enpuiin ZPM General Headquarters hruaitute te an thawk chhuak a. Gen. Hqrs. hruaitute hi Ward No. 7 Campaign Committee-in lo dawngsawngin Inthlan an nghahhlelh tawh thu leh an phur tawh thu lo an hrilh niin ZPM Gen. Hqrs. chuan thuchhuah siamin an sawi.

AMC inthlan campaign neih chhoh mek lai hian Peoples’ Conference Party chuan ward tinah candidate neih tuma hma lâkna thui tak an neih tawh hnuah, nikum December ni 5-a Election Commission Of India (ECI)-a  Party hming thlak an dilna vawiin thlenga chhanna an la hmuh loh avangin AMC Inthlanna an chuh ve dawn loh thu an sawi.

Vawiina thuchhuah an siamah PC Party chuan hetianga rokhawlhnain an Party a tlakbuak avanga AMC inthlan an chuh ve dawn tak lovah chuan, AMC Ward tina PC Party mi leh sâ te sukthlekna lam tur Office Bearers meeting-in karleh Thawhtanni-ah an ngaihtuah dawn tih an sawi bawk.

- AIR Aizawl