Minister Dr. R. Lalthangliana'n Hnahthial district a sawrkar pisa hrang hrang hotute kawm

Aizawl | January 28, 2021: Health & Family Welfare, Commerce & Industries department changtu Minister leh Hnahthial Assembly Constituency bialtu MLA ni bawk Dr R Lalthangliana  chuan vawiin chawhnu khan Hnahthial tlawhin Hnahthial district a sawrkar pisa hrang hrang enkawltute a kawm.




Hnahthial DC's Conference Hall-a inkawmhona ah hian bialtu MLA, Minister ni bawk Dr. R. Lalthangliana chuan Hnahthial District thar puan a nih hnu lawkah beisei loh deuhin COVID-19  boruakin min tuam avangin Hnahthial district-a sawrkar pisa hrang hrang dinhmun hrechiang tura inkawmhona kan nei remchang thei lawk lo hi a pawi ka ti hle a, boruak a ziaawm tak deuh hnu ah remchang dapin hun tha tak kan nei thei ta hi a lawm hle a ni, a ti.

Minister chuan COVID-19 dona kawngah Hnahthial district hmalakna a chhuanawm a tih thu a sawi a, Hnahthial mai bakah Mizoram chu mipuite leh tlawmngai pawlte bakah kohhran hruaitute, khawtlang hruaitute leh sawrkar thawhhona a that avang leh Pathian zahngaihna avangin India rama he hripui tuar nep ber State kan ni hial mai hi a ropui a, kan zavaia kan thawh rah liau liau a ni e, a ti a. Thla thar atang sakhaw biakna hmuna inkhawm kan phal tawh dawn a, hei bakah hian zirna in zawng zawng a pawl hniam ber atanga a pawl sang ber thlenga hawng turin ngaihtuahna sen mek a ni bawk a, heng hunah te hian mipuiten kan zawm tur leh kan tih ve tur a awm a ni tih hre reng ila, thuawih taka kan awm zel hi kan himna tur a ni tih hriain sawrkar zai ngai chunga awm zel a pawimawh a ni, a ti.
Minister chuan India leh Myanmar insumdawn tawnna hmun pawimawh tur Saisihchhuah leh Bungkhawkai te chu Hnahthial district chhunga awm an ni a, hengte hi a puitlin hunah chuan Hnahthial district pawhin hma kan sawn lehzual pui ngei ka beisei a ni, a ti bawk.
Vawiin inkawmhonaah hian sawrkar pisa hotuten an hmalakna leh an hlawhtlinnate bakah district office puitling anga kal tura an mamawh leh hmachhawp chi hrang hrangte an sawi a, Minister chuan a theihna ang chin chinah lo bawhzui a tum thu a sawi a ni.
Vawiina district pisa hrang hrang report zingah dan leh thupek kenkawh kawnga harsatna a awm loh thu leh mipuite leh khawtlang hotuten police an thlawp that leh an tanrualna a that thu tarlan a ni a. Hnahthial district a police station zawng zawngah engtiklai pawha biak pawh reng theihna turin mobile phone pek vek an ni a, Hnahthial, South Vanlaiphai leh Thingsai police station-ah CCTV dah vek a ni bawk a ni. Hei bakah hian Hnahthial police station ah Women's Rest Room leh Child-friendly room siam a ni a. Kum kalta chhung khan Hnahthial district police ten ruihhlo - Methamphetamine kg 8.748 leh Heroine no. 4 gram 429.57 an man a, tualchhung market ah Rs. 1,82,86,000/- man hu a ni.
Tun dinhmunah Hnahthial district-ah COVID-19 hrileng kaihhnawiha quarantine lai mek mi 33 awmin TrueNAT hmanga sample test tawh zat hi 996 a ni a, COVID-19 positive mi 19 hmuhchhuah tawh niin an negative vek tawh a, COVID-19 positive enkawl lai an nei lo a ni. Hnahthial district-a Middle School zawng zawngah CSS Hindi Teacher dah vek a ni tawh bawk a, Jal Jeevan Mission hnuaiah khaw 13-ah in tinah tui connection pek an ni tawh a, khaw dang 9 la awm te chu he scheme hnuaia thun leh turin a tul anga hma lak mek a ni bawk.
Dragon Fruit leh off-season Cabbage leh off-season Tomato ah nasa takin Horticulture department in hma an lak thu tarlan niin, a hlawhtlinna pawh an hmu tan a, kum kalta chhung khan Dragon Fruit thar tam berin quintal 24 a tharchhuah thu tarlan a ni bawk. Agriculture department-in SEDP hnuaiah motor chana hectare 100 a zau ah an ching a, vaimim chingtu beneficiary te an hlawhtlin thu leh a hralhna lam ngaihtuah a tul thu tarlan a ni bawk.
Hnahthial district bawrhsap Pu Vanlalmawia chuan Hnahthial District tihpuitlinna tura bialtu MLA hmalakna fakawm a tih thu sawiin, a bik takin DC office tihchangtlun kawngah nasa taka a puihna avangin lawmthu a sawi bawk a ni.
Minister hi Industrial Development Board Vice-Chairman Pu C. Ramhluna bakah Commerce & Industries leh I&PR officer ten an tawiawm a ni.

- DIPR

Post a Comment

0 Comments