Aizawl | January 7, 2020: Nimin zing khan Sports Minister Pu Robert Romawia Royte leh Sports Department Officers ten Republic Venga MSSC Sports Complex chhunga Futsal Ground siam dan tur a hmunah an enho a. Uluk taka Engineer ten an teh hnuah Standard middle size Futsal ground leng theia ngaih a ni.
Pu Robert Romawia chuan Local Council Election laia an lo sawi tawh angin Republic vengah hian Futsal Ground siam hna chu țan chhoh mai an tum thu a sawi a. Futsal infiamna hi tunlaiin thalai te bakah kum upa lam tawh pawhin an tuipui hle a. A khelhna tur ground a tam loh avangin an indaihlo hle tih sawiin futsal ground thar buatsaih tur chu helai area a cheng te tan a vanneih thlak dawn a ni, a ti.
Sports Minister chuan Republic MSSC sports Complex chhunga Cricket Pitch leh Volleyball Court siamna hmun turte a en bawk a. MSSC Engineers te chu a hmun lo teh fela, drawing te siam turin a ti nghal a ni.
Minister hi Republic veng khawtlang hruaitute pawhin an tawiawm a. Republic Veng Local Council Chairman Pi Engmawii chuan Sport Minister hmalakna avanga Futsal Ground thar siam tan a ni tur chu lawmawm a tiin an khawtlang aiawhin lawmthu a sawi a ni.
Post a Comment
He post chungchanga i ngaihdan lo sawi ve rawh: