Phalna nei lova Mizoram-a ramdangmi lo lut thin MNF sorkar-in a remti lo - Rajya Sabha MP

Aizawl | January 25, 2021: Rajya Sabha MP Pu K Vanlalvena chuan phalna nei lova Mizoram-a ramdangmi lo lut thin chu MNF sorkar chuan a remti lo a, hma an la zel dawn a, dan lova ram dang mi lo lut thinte chuan khua leh tui dik takte chanvo nasa taka an chhuhsak thin chu an dang tlat dawn a ti.

Thuchhuahin a tarlan danin, MP hian Zirtawpni khan Tlabung leh a chheh vela BSF Battalion Out Post hrang hrang Tlabung Out Post, Khojoisuri Out Post, 199 Batallion Out-Post leh 22nd Tablabagh Border Out Post -te chu BSF Speed Boat hmangin a tlawh a. Bangladesh nena inrina 'Kawrpuichhuah' leh Tepreghat Border Fencing, Gate no.1 to 3-te a tlawh nghal bawk. Heng hmun hrang hrangahte hian Pu K. Vanlalvena chuan thu a sawi a, BSF-te, Assam Rifles leh BRTF-te chu tlangmite thian an nih angin, an awmna hmun apiangah tualchhung mite nen harsatnaah inpuitawnin, inthian thatna tha tak nei turin a chah a. A kal chhan ber pakhat chu Bangladesh atanga Chakma Foreigner, dan lova lut leh chhuakte an awm em tih fiah tur leh helai ramri vela mipui harsatna hrang hrangte enfel tura kal a nih thu a sawi.

Pu Vanlalvena chuan chuan, helai hmuna BSF-ten hriselna lama hma in sawn theih nan PHC changtlung tha tak an neih theihna tur leh Khawthlangtuipui kanna Tlabung leh Mausen karkawnga Lei dawh a tul thu Central sorkarah thlen a tum thu bakah Kawrpuichhuah Border Trade Centre dinna tur chak zawka kalpui a nih theih na’n Central lam hotute dawr a tum thu a sawi bawk a ni.

- AIR Aizawl

Post a Comment

0 Comments