Ram pumah National Voter's Day hmang dawn

Aizawl | January 25, 2021: Vawiin January ni 25 hi National Voter’s Day a ni a, ramchhung hmun dangte rualin Mizoramah pawh chief secretary Pu Lalnunmawia Chuaungo hovin hemi pual hian inkhawm koh a ni.

Joint Chief Electoral Officer Pu David Liansanglura Pachuau sawi danin National Voter’s Day pual hian New Capital Complex-a Secretariat conference hall-ah hemi pual inkhawm hi buatsaih a ni ang a. Hemi ni puala Chief Election Commissioner thuchah chhiar chhuah a ni ang a electoral photo identity card nei thar mi 10 hnenah chief secretary-in an card hi a hlan dawn a ni.

Kum dangah chuan he ni hi larsap hova ropui taka lawm thin a ni a, kuminah chuan Covid hri leng avangin official tlemte, tlawmngai pawl hruaitute leh zirlai tlemte chauh sawm an ni.

Vote nei chinte puala ni serh hran National Voters’ Day chu vawiin hian ram pumah lawm a ni dawn a. He ni hi vote nei tharte pual deuh bika hman thin a ni. 

 National Voters’ Day hi kum 2011 atang khan kumtin January ni 25-ah hman thin a ni a, Election Commission of India din ni hriatrengna atana tih a ni. 

 New Delhi-a lawmnaah chuan President Ram Nath Kovind-a chu khual lian a ni ang. Kumin National Voters’ Day thupuiah chuan Vote neite thuam chak, tih-him leh kawhhmuh tih a ni dawn a. Commission remruatna zulzuia Covid-19 hri leng kara him taka inthlan buatsaih a kawk tel bawk a ni. 

 President chuan kum 2020-21 atana National Awards a pechhuak ang a. ECI Web Radio: ‘Hello Voters’ tih chu a hawng bawk ang. 

 National Voters’ Day hi vote neite hnena inthlana tel pawimawhzia inhrilh-hriatna atan hman thin a ni bawk a ni. 

- AIR AIzawl