Miss India Mizoram Muansangi'n naupangte tan tanpuina khawn; Miss India intlansiaknaa bituk zat a la tlin lo!


Aizawl | January 4, 2021: Miss India thlanna kal mekah Mizoram aiawhtu Miss India Mizoram Lalmuansangi Varte chuan naupang cancer veite tan tanpuina a khawn mek a, Miss India in a bituk a la tlin lova mipui thlawpna a mamawh hle. 


Miss India buatsaihtu lamin finalist 31 te chu India a naupang cancer veite tanpuinana cheng nuaih khat aia tlem lo khawn turin bituk a siamsak a ni.

Lalmuansangi Varte chuan December 31, 2020 zan khan Champhai Zotlang-a an in kawtah VC leh YMA hriatpuina in a chhungte leh thiantha te puihnain Charity Street Concert a buatsaih a.  Amah a zai a, a nu a zai bawk a, a pa music leh sound lam enfel tuah a tang a, a thiante leh unaute an zai bawk a. Hripui vanga mipui punkhawm theih loh a nih vangin tang tak siin an riang hle a ni.


Lalmuansangi Varte hi Miss Mizoram 2020 pathumna leh Miss Mizoram Champhai lallukhum khumtu a ni a, Miss Mizoram 2020 thlannaah khan Miss Talented a thlan a ni bawk. (A chanchin kimchang HETAH a awm.)

Mizo zaithiam leh a film channa tlangzarh mai hmabak Teddy Sailo pawhin a tawiawm!

Miss India 2020 thlanna kal mekah hian VLCC Femina Miss India 2020 finalists 31 te chu Child Help Foundation tan, Naupang natna khirh veite enkawlna atan online-a tanpuina khawnna website Ketto.org kaltlangin a tlem berah cheng nuaih khat theuh khawn tura tuk an ni a. Finalist zingah hian Punjab state aiawhtu Karuna Singh in hmu hnem ber tawhin mi 87 in an thawh atangin 3,71,214 a hmu tawh a, a dawtah Gujarat aiawhtu Khushi Misra niin, 3,66,546 a hmu tawh bawk a ni. Mizoram aiawhtu Lalmuansangi Varte erawhin cheng 3000 chiah a la dawng! A hniam ber dawttu-ah a awm mek a ni!


"Charity raise tur hian ka theihtawp chhuah ve phawt a, thil tiha bul tan ka duh a. Ka duhna te Pathianin min hriatpui a, mite thinlungah hna a thawk a, min tih hlawhtlin tir a ni." tiin EXPLOREMIZORAM.COM a hrilh.


Miss India Mizoram 2020 Lalmuansangi Varte chuan, "Pathianin hna a thawka  cheng 67,000 lai mai mi tlawmngaite hnen atangin kan hmu a. A lawmawm takzet." tiin EXPLOREMIZORAM.COM a hrilh.

He an thil buatsaih-ah hian cheng 67,000 an hmu tawh a, Ketto.org kaltlanga cheng 3000 a hmuh tawh nen cheng 70,000 chu a hmu tawh a ni.


Lalmuansangi Varte chuan, "Nuaih khat  la tlin chiah lo mah ila, Pathianin rem min ruatsak zel dawn tih ka hria a ni. Lalpa nen chuan engkim a tih theih si a." tiin Pathiana beiseina a nghah thu EXPLOREMIZORAM.COM a hrilh bawk.

Ketto-ah Muansangi pui tur leh India rama naupang natna khirh tak takin a bawm mekte pui turin HETAH hian hmet rawh le. Miss India-a Mizoram aiawhtu Lalmuansangi i thlawpna i tihlan pahin India Naupangte i pui bawk ang a, Lungte pakhatin sava pahnih i vawm thla dawn tihna a ni.


Muansangi thlalak hrang hrang HETAH hian a awm e.

Muansangi chanchin chhiar duh tan HETAH hian dah a ni.

Muansangi chungchang post dang HETAH hian a awm e.

Post a Comment

0 Comments