Lunglei civil hospital atangin naute rukbo hmulet leh; Police in venhimna pe nghal

Aizawl | January 25, 2021: Nimin zing dar 4 vela Lunglei Civil Hospital atanga nausen ni 4 vela upa, tu tih hriat lohin a lak chhuah chu,  Lunglei Police ten report an dawn atanga darkar 15 chhungin him takin an hmuchhuak.

He thu hi Police chuan tichhuakin, CM zoramthanga Instagram account-ah pawh police in an zawnna hi post a ni.

Nausen hi nizan dar 10:45 velah Police ten a kawltu hnen atangin dam takin an la chhuak a.  Nausen hi ngaihtuahawm a ni lo niin thudawnna chuan a tarlang.

 

A kaihhnawihte Police lamin an chhui zui mek niin tarlan a ni bawk.

Thudawnnain a tarlan danin, Damdawi in atanga nausen ru chhuaktu hi Vanlalnghaki kum 40 mi Lunglei Farm veng a awm a ni a, Lunglei Civil Hospital-ah hian mi aiawhte pawh a lo thawk ve thin tawh a ni. 

A pasal hmasa nena an fate kum tling an ni tawh a, tuna a pasal nen fa an nei thei lo. Fa a awt lutukin heti hian damdawi ina naute chu a ru ta mai niin an sawi. Vanlalnghaki hi case siam sak a ni.

Nausen rukbona thlen theihna damdawiin hi nau neih nana him a ni zel ang em? Hetiang thil la thleng palh thei-ah venhimna uluk lehzuala an kalpui a ngai hle dawn a ni.

Lungleia naute rukbo chungchangah vawiin chawhma dar 11 khan Lunglei SP Pu Stephen Lalrinawma hovin SP Conference Hall-ah chanchinbu mite kawmin, "Dt.24.01.2021 (Sunday) chawhma lam khan Lunglei Police Station ah Dilon Chakma Tiperaghat hnen atanga FIR dawn niin a fapa ni li (4) a upa dt.20.01.2021 a piang chu Civil Hospital nau neihna ward atangin hmeichhia pakhat amah tunge a nih hriat loh, damdawi in a thawk anga thawmhnaw inbel chuan a lak bo thu a sawi a. Hemi chungchangah hian Lunglei Police Station Case No.14/2021 dt.24.01.2021 u/s 363 IPC ziahluh ni in uluk taka chhui nghal a ni." a ti.

"Hnuchhuina kal zelah dt.24.01.2021 zan dar 10:30 Pm khan Vanlalnghaki (40) w/o Lalnunpuia of Tlabung Zodin, a pate in Lunglei Farm venga awm mek hnen atangin naute bo hi him dam taka hmuh let leh a ni a. Naute hi Lunglei Civil Hospital-ah a hringtu nu hnenah dah let leh a ni, police venhimna pek nghal a ni." a ti a.

Vanlalnghaki hi Police hian thu zawtfiah nghain ani hian Dilon Chakma fapa hi dt.24.01.2021 zinglam dar 4:30 Am vel khan Civil Hospital Gynae Ward Bed No.13 atanga a lak ngei thu a sawi a. Vanlalnghaki hi kum 2019 leh kum 2020 chhung khan Lunglei Civil Hospital-ah hian IV Grade mi ai kalin a lo thawk tawh thin a. Amah hi dan anga man nghal a ni a. Hnuchhuina hi uluk taka neih chhunzawm zel a ni, tiin SP chuan a tarlang.

Press Meet-hi Lunglei SP Pu Stephen Lalrinawma, Addl SP Pu Jakob Hlychho, SDPO Pu C.Lalfakmawia leh Lunglei Police Sation OC Pu LP Zohmangaiha ten kaihruaiin Lunglei District media mi thahnem tak an tel a. Zawhna leh chhhanna hun hman chhunzawm a ni.