AH & Vety Minister-in Mampui Vety Farm a tlawh

Aizawl | January 16, 2021: Mizoram sawrkara Animal Husbandry & Veterinary (AH & Vety) Minister Dr K. Beichhua chuan tukin zingkar khan Lawngtlai District-a Mampui Vety Farm a tlawh a, Farm enkawl zui zel dan tur a enfiah.


Minister hian Mampui Vety Farm a tlawh hmain, Lawngtlaia Veterinary Hospital building sak mek chu a en hmasa a. He Vety Hospital hi National Bank for Agriculture and Rural Development (NABARD) hnuaia Rural Infrastructure Development Fund (RIDF) sum Rs nuai 85 senga sak mek niin, a sak hna hi AIE Construction, Aizawl te'n an thawk a, hna hi zaa sawmsarih (70%) vel zawh tawh a ni.


Mampui AH & Vety Farm a tlawhnaah hian Minister Dr K. Beichhua chu AH & Vety Department Additional Director Dr H. Laltlanmawia'n a tawiawm a. Lawngtlai District AH & Vety Officer Dr Thanseia Chhangte, Mampui Vety Farm-a Chief Veterinary Officer Dr Lalthankhumi, Veterinary Officer Dr Charlie Chawngthu leh thawktu dangte'n lo dawngsawngin, an dinhmun leh harsatnate a hnenah hian an lo thlen a. Artui awp keuna (poultry hatchery), bawng vulhna (calf rearing centre) leh vawk note thar chhuahna (piglet multiplication centre) te fang kual nghalin, a tihchangtlun dan tur leh hma lak zui dan tur an en ho nghal a ni.


Dr K. Beichhua chuan ei leh bar leh sum leh paia ram intodelh nan AH & Vety Department chu a pawimawh hle tih sawiin, thawktute chu ram tan theih tawp chhuah turin a chah a. Sawrkar paw'n chak taka hma lain, Mizorama district pasarih (7)-ah Veterinary Hospital sak mek a ni a, Lawngtlai Dispensary chu Hospital-ah hlan kai niin, Chawngte Rural Animal Health Centre pawh Dispensary-ah hlan kai a nih tawh thu a sawi.
Minister chuan Mampui Vety Farm chu kum 2019 January thlaa a tlawh thu leh chutih laia vawk awmte chuan vawk natna PRRS (Porcine Reproductive and Respiratory Syndrome) an vei vek avangin a zavaia tihral a nih thu sawiin, COVID-19 hri leng vanga hun rei tak hma lak chhunzawm theih lohva a awm hnuin, vawk dahna in te chu chei that a, vawk pawh dah leh thuai tum a nih thu a sawi a. Mampui Vety Farm-a thawktute chuan vawkpui kah raina hmun leh a khawl a awm sa thu sawiin, a chi thlah tur vawkpa an vulh leh hunah hman chhunzawm leh nghal theih a ni ang, tih an sawi.
Vawk natna hri chungchangah hian AH & Vety Minister Dr K. Beichhua chuan state pawn lam atanga vawk lak luh chu hun eng emaw chen khap a nih tawh thu sawiin, pawn lam atanga vawk lak luh avanga tualchhunga vawk awm sa a mang mai loh nan fimkhur a tul hle a ni, a ti a. Hmun dangah ar natna hri (bird flu) a len avangin state pawn atanga ar note leh a chaw la lut tur paw'n phalna lak hmasak a ngai tih sawiin, he'ng ran hri laka him tur hian mipuite pawhin sawrkar thuchhuak chu zawm a, sawrkar tawiawm theuh turin a ngen nghal a ni.
Mampui Vety Farm enkawltute chuan November 2020 khan poultry hatchery-ah artui 960 an awptirah 800 a keu tih sawiin, 83.3% awp keu ang a ni a. Ar note hi pakhat Rs 60-in an hralh chhuak a. Hemi atang hian ar note 200 chu anmahni'n Farm-ah hian an vulh nghal a ni. Minister chuan ZPDS Tanhril atanga artui a awm theih chuan February thla tawp lamah Mampui Vety Farm-a poultry hatchery-ah hian artui awp keutir leh hman tum turin thawktute chu a chah a ni.
Mampui Vety Farm-ah hian bawng note vulhna (calf rearing farm)-ah bawng 8 an vulh mek a, bawngpui (no nei tur) vulhna (calf breeding farm)-ah bawngpui 6 an vulh mek bawk a. CBF-a an vulh laiah hian a rai lai 1 leh hnute sawr lai 2 an awm a ni.
Minister hi Mampui Vety Farm a tlawhnaah hian Aizawl atangin department official-te, Lawngtlai atangin LADC-a Executive Member leh MDC leh party hruaitute leh official thenkhatte'n an tawiawm a ni.

- DIPR

Post a Comment

0 Comments