Hri danna lak pui ber ram pumah kalpui; Mizoram-ah Lalmuanpuii'n dawng hmasa ber

Aizawl | January 16, 2021:  Covid-19 laka invenna damdawi Covishield chu vawiin khan rampum a tan a nih rualin pek tan a ni ta a. Mizoramah chuan Civil Hospital, Aizawlah Pi Lalmuanpuii (44), Nursery Veng pek hmasak ber a ni.

Lalmuanpuii'n Hri danna a dawng lai | AIR Aizawl

Mizoram a Covid-19 Vaccine dawng hmasa ber Pi Lalmuanpuii (kum 44) Nursery Veng ami chuan hri danna a dawn zawh hian State Immunization Officer Dr Lalzawmi hnen atangin Certificate a dawng.

Rampum tuam chhuak, khawvela Covid-19 hridanna lak pui tham ber chu vawiin khan Prime Minister Narendra Modi-a’n a khuhawn hnu-ah ram pum-ah pek tan  a ni.

Chief Minister Pu Zoramthanga’n, "Covid-19 hridanna lak chu mimal duhthlanna ni mahse; mi zawng zawng an him a, an damtlan nan lak vek a pawimawh," a ti.

Covishield hi dose 18500 chu Central kaihhruaina leh kalphung hnuai-ah January 14 khan Air India thlawhna hmangin Mizoram lo phurh thlen  a ni.

Vaccine hi vawihnih chiu (2 dosage) tur a ni a,  chiu hmasak (1st dosage) atanga ni 28 hnuah a vawihnihna hi pek an ni leh ang.

A thawhkhatnaah hian Healthcare worker (damlo enkawltu) mi 8000 chuangin Vaccine hi a thlawn vekin an dawng dawn a ni.

January 18 ațangin district zawng zawngah vaccine pekchhuah hi kalpui a ni ang.

Covid-19 hridanna lak runpui hian India ram dung leh vang a tuam chhuak vek dawn a. A hawnnaah hian State leh UT zawng zawnga hridanna lakna hmun 3006 chu thlunzawm vek a ni a. Vawiin a hawnni-ah hian hridanna pekchhuahna hmun tin atangin mi za vel theuh hridanna pek an ni ang.  

 Covid-19 hridanna hi pek hmasak mamawh zuala ngaih atanga bul tan tur a ni a, Sawrkar leh mimal damdawiina hnathawk te, ICDS hnathawk tiamin tun tumah hian pek hmasak an ni ang. 

 

Vaccine dawng hmasa tur te'n an mobile phone ah sms an dawng a, vaccine lakna hmun tur hrilh an ni bawk a ni.

Vaccine la turte'n Aadhar card leh ID Card an neih angte an ken ngei ngei a tul bawk a ni.

Khawvel pumpuia hrileng danna damdawi pekchhuah (vaccination drive) lian ber tur "COVID-19 Vaccination Drive" chu vawiin chawhma dar 10:30 khan Prime Minister Narendra Modi-a'n New Delhi-ah a hawng a, hemi pual inkhawm hi Mizoram chhunga COVID-19 vaccine pekchhuahna tura ruat zinga hmun 5 ah vawiin chawhma dar 9:00 khan neih a ni.

Health minister Dr R Lalthangliana | DIPR

COVID-19 Vaccination Drive neih tan pual inkhawm Aizawl Civil Hospital Auditorium-a buatsaih ah Health Minister Dr. R.Lalthangliana chuan hman puiin Mizoram-in COVID-19 hrileng do kawnga hma kan lakna hi a chhuanawm takzet a, Sawrkar hotulu ber Chief Minister kaihhruaina hnuaia Zoram mipui zawng zawng ka tangrual a, COVID-19 tluka Mizo mipuite thukhat vuana min tanrual tirtu an awmin ka hre lo a ni, a ti a. Sawrkarin mipuyi mar dek chung leh mipui aiawh sakhaw hruaitute bakah tlawmngai pawl hruaitute rawn chungin hma a la thin a, heng hmalaknate mipuiten kan thlawp that avangin dinhmun tha takah kan ding a ni, a ti. Khawvel ram hrang hranga mithiam rual ten COVID-19 hri danna siam chhuah tumin theihtawp an chhuah a, India ram pawhin nasa taka tan la in COVID-19 kan hmelhriat atanga kum khatna ah hri danna chihnih a siam chhuak ta a. heng hri danna te hi uluk taka enchhinna kalpui a nih avangin a him tawk a ni tih sawrkar laipuiin a puang a, keini pawhin ngaihngam takin kan lo dawnsawn a pawimawh a ni, a ti bawk. Minister chuan COVID-19 hrileng dona kawnga theihtawp chhuahtute zawng zawng chungah leh Zoram mipuite chungah lawmthu a sawi a, kan thuawihna leh kan tanrualna in rah tha a chhuah a, thla thar atang chuanBiakin leh sakhaw hmunahte inkhawm kan phal tawh dawn a, fimkhur taka ruahmanna kan siam ang angte tha taka kan zawm tlan chuan reilote ah mumal leh fawmkim zawkin kan inkhawm theih thuai ka beisei a, chutiang bawkin zirna in pawh karleh mai atangin kan hawng tan dawn a, a bul kan tan that chuan kan a hlawkna kan tel zel dawn a, inkaihhruaina dan kan thlahdul hret dawn avang leh vaccine a awm tak avang hian inthlahdah tur erawh kan ni lova, fimkhur taka kan awm chhunzawm zelerawh a pawimawh hle a ni,a ti.

Dr Lalzawmi | DIPR

Report petu Dr. Eric Zomawia, Mission Director, National Health Mission chuan  India ramah COVID-19 vaccine chihnih Covaxin leh Covishield hman tur a nih thu sawiin, mizoramah chuan Covishield kan dawng a ni, a ti a. Vaccine dawngtu tur thlan chungchangah State sawrkarin thu leh hla a nei lova, central sawrkarin an rawn thlang vek a, a dawngtur diktak ten an dawn ngei theih nan election mode in  kalpui a ni a, vaccine dawng hmasa tur te'n an mobile phone ah sms an dawng a, vaccine lakna hmun tur hrilh an ni bawk a, Vaccine la turte'n Aadhar card leh ID Card an neih angte an ken ngei ngei a tul bawk a ni, a ti.

Vaccine hi dose hnih (vawihnih) pek tur an nih thu sawiin dose khatna an dawn hnu ni 28 ah dose hnihna pek leh tur an ni a, dose hnihna an dawn atanga ni 12 hnu ah vaccine hian a thawh tur ang takin a thawk dawn chauh a, hei vang hian vaccine late pawh an fimkhur zui rih zel a tul dawn a ni, a ti a. Tun tuma dose 18500 lo thleng hian vaccine dawng hmasate chan tur dose hnihna a keng tela, healthcare workers tun tuma vaccine la dawnglote pawh an hun a thlen hun tur dawhthei taka nghak tura chahin database a hming dah luh zawng zawng chuan an dawng vek dawn tih a sawi a ni.

Vawiina COVID-19 Vaccination Drive neih tan pual inkhawm Aizawl Civil Hospital Auditorium-a buatsaih hi Commissioner & Secretary, Health department Pu H. Lalengmawia'n a kaihruaia, Dr. Lalzawmi, State Immunization Officer in lawmthu sawina hun hmangin a khar a ni. Hun hman zawh a nih hnu hian Prime Minister Narendra Modi-a'n New Delhi atanga COVID-19 Vaccination Drive Virtual National Launching a neih chu online in chhim nghal a ni a, hemi zawh veleh hian vaccine dawngturte hnenah pekchhuah chhunzxawm nghal a ni.

Health secretary H Lalengmawia IAS | DIPR

Vawiina Vaccine pekchhuah hmasak berna hun hi Mizoramah chuan Aizawl Civil Hospital, Lunglei Civil Hospital, Zoram Medical College, Kulikawn Sub-District Hospital leh ITI Urban PHC ah te hman niin healthcare workers 500 in vaccine hi an dawngv a, karleh thawhtani atangin Mizoram chhung district zawng zawngah kalpui chhunzawm a ni ang a, a thawhkhatna a vaccine dawngtur healthcare workers mi 8000 chuang hi January thla chhunga pek kim vek tur a ni.

- DIPR | AIR Aizawl