Aizawl | December 7, 2020: Thla liam ta November 21, 2020-a Phaizau khaw bul Tut luia bomb hmanga sangha mantute man an la nih loh avangin vawiin khan Mamit DFO hnenah hma la tura ngenna lehkha Peoples' Conference Party chuan theh lut.
Peoples' Conference Party chuan, "Bomb hmanga sangha man avangin mi tam tak man lo ni tawhin hrem hial an ni tawh a. November 21, 2020-a Tut luia bomb hmanga sangha man hi a finfiahna tur thlalak pawh tam tak awmin media-ah theh darh a ni a. Chumai bakah sangha mantute hian pawisa hial an chawi a. Finfiahna chiang tak a awm chungin tun thlengin sangha beitute hi man an la ni lo." tiin.
"He sangha mannaah hian Mamit Constituency bialtu MLA Er. H Lalzirliana a tel nia sawi a ni a. Mipuiin thu dik kan hriat nan chhuichian a ngaizual a. Dikna rorelna lekkawh ngei a ṭulzual a ni. Chuvang chuan Mamit DFO hnenah kan party elected office bearer zinga vigilance leh legal lam changtu kan Sr. Vice President Pu Vanlalruata hmingin chhui chianga Dan hmanga hma la turin kan ngen ta a ni." tiin Peoples' Conference Party chuan thuchhuah an siam.
Peoples' Conference Party thuchhuah chuan, "Bomb hmanga sangha man hi Explosive Act, 1884 te; Mizoram Forest Act, 1955 te; Wildlife (Protection) Act, 1972 te; Biological Diversity Act, 2002 te leh Mizoram Fisheries Act, 2002 te kalh a ni a. Kum 7 thleng lung ina tan mai baka cheng nuai 2 thleng chawi tira hrem theih a ni a. Mipuiin dikna rorelna kan hmuh thuai kan beisei tlat a ni." an ti bawk.
Post a Comment
He post chungchanga i ngaihdan lo sawi ve rawh: