MZP in College zirlai hruaitu pass tharte lawmpuina hlan; MZP pisa kumin atan khar bawk

Aizawl | December 7, 2020: Vawiin December ni 7, 2020 Thawhṭanni Chawhma dar 11:00 hian MZP Pisa Pui, Treasury Square Aizawl-ah kum 2020 chhunga Pisa kharna programme hman a ni a. Pu Peter Chhangte Vice President chuan kaihruaiin, Pu Lalnunmawia Pautu, General Secretary chuan pawl hmalakna hrang hrang report a pe a. MZP Chhungkua College SU leh Hnampual Zirlai Pawl hruaitu degree nei thar te lawmpuina hlan an ni bawk.


He huna thusawitu Pu B. Vanlaltana, MZP President chuan, "Covid-19 avangin kum 2020 chhungin MZP in kan ruahmanna leh kan beiseina angin Activity nei theilo mah ila, kan hmalakna chinah hlawhtlinna nasa tak kan chang a. Hei hi kan thawhhona zar a ni a. Inlungrualin, thawhhona ṭha neiin Zirlaite leh kan ram leh hnam tan ke pen zel turin ka sawm che u a ni". a ti a. Zirlaite chu Krismas leh Kumthar vuakvetah khawtlang tana mi ṭangkai ni tur leh mahni awmna hmun ṭheuhah harsatna siamtu ni lova midang tana malsawmna ni vek turin duhsakna ka hlan a che u a ti bawk.


He programme-ah hian MZP Calendar 2021 chu Pu B. Vanlaltana chuan a tlangzarh a. MZP Chhungkua College SU hruaitute leh Hnampual Zirlai Pawl hruaitu zirnaa hlawhtling Degree nei tharte lawmpuina hun hman a ni bawk.

Post a Comment

0 Comments