Aizawl | December 12, 2020: Tlabung Village Council huamchhunga awm, Dinthar khuaa Bru-ten YMA din an dilna chu ningani zana YMA Tlabung branch executive committee ṭhukhâwm chuan a hnawlsak.
Tripura aṭanga hruaikir Bru chhungkaw 65 awmna Dinthar-a chengte hian, an khuaah Young Mizo Association branch din ve an duh thu, lo thlen tawh mah se pawmsak an ni tawh lo va; hemi hnu hian YMA : Tlabung branch hnuaia section pakhat ni turin YMA section din an duh thu an thlen nawn leh a ni.
YMA Tlabung branch chuan, Bru mipuiten khawtlang an inrèlbàwlna kawngah tlawmngai pawl lian tak an mamawhzia an sawi chu an hriatthiampui thu sawiin, YMA din erawh hnam hnuk khawih thil nia an hriat avangin rem tih chi-a an ngaih rih loh thu an sawi.
Hnam dang thenkhat pawhin anmahni hnam bil pual tlawmngai pawl an neih ve thu, YMA Tlabung branch chuan sawiin, Young Chakma Association-te nen pawh a hunah chuan ṭha taka an thawhho fo thu an sawi a; Bru-te pawh Young Bru Association emaw pawl dang din ve mai tura an duhsak zawk thu an sawi a ni.
- Tlabung Post
Post a Comment
He post chungchanga i ngaihdan lo sawi ve rawh: