Short Film leh Short Awareness Video Clip intihsiak lawmman sem

Aizawl | December 15, 2020: Information & Public Relations Department Leh Mizoram Film Forum te buatsaih intihsiakna chi  hnih- lemchan tawi, leh COVID-19 chungchanga mipui zirtirna lam hawi  video clip tawi siam intihsiak ‘Short Film Competition and Short Awareness Video Clip Competition’ lawmman vawiin khan sem a ni a, he hun hi Pi Lallianpuii, Director, I & PR Department in I & PR Auditorium ah a hmanpui a ni.

Pi Lallianpuii chuan hripui leng karah pawh Sawrkarin thalaite tan remchang leh an talent tihpun dan a ngaituah reng a, hemi atan hian harsatna karah pawh film siamtute, lemziak tute leh thlalatu te tan intihsiakna leh programme dang siam anih thei nan sum a ruahman tih a sawi a. Hengte chhawrtu ten Sawrkar leh mipui tan enge kan tih ve theih tih chu an ngaituah ve ngei tha a tih thu sawiin film siamtu te  phei chuan mipui hrilhhriat leh zirtir kawngah thil tha tam tak an ti thei a ni, a ti.
Director chuan khawvel changkanna avangin Mizo nun zemawi tam tak a bo mek a. Aia upa zahna te, tlawmngaihna te, inngaihtlawmnate leh Mizo nuna thil mawi leh tha te film siamtu ten tuipui se. Hetiang lam hawi hi an film siamah te lang tam se tiin a fuih bawk a ni.
Pi Lallianpuii chuan film hian mihring rilru a hneh hle  tih sawiin hmaraw hriam a nih dante, rilru leh ngaituahna a den ril dan te sawiin Mizoram leh Mizote chanchin khawvel zau zawka pholanna hmanrua tangkai tak a ni thei a, Mizoram pawna competition leh Film Festival ah te Mizo film siamtute kutchhuak pholan anih theih nan tan la turin ka duh cheu ni, a ti.
Lawmman semna programme hi Pu Lalawmpuia Khiangte, Chairman Mizoram Film Forum in kaihruaiin Sawrkarin film siamtu hmakhaw ngaia intihsiakna a siam chu lawmawm a tih thu a sawi a. Intihsiakna chungchanga report chu Pi K. Vanlalsangi, Deputy Director leh Nodal Officer, Visual Arts in a pe a ni.
Short Film intihsiaknaah hian film 23 (15-20 minutes) a lut a. Heng film ah te hi Mizo zia leh nunphung tarlanna te, history behchhan a siamte leh tunlai mila thawnthu awmze nei te an ni a. Lawmman pakhatna chu TC Vanlalzauva siam ‘Thangchhuah Diar’ film in la in, sumfai cheng 70,000 leh certificate a dawng a. Pahnihna chu Khawhai Village Council siam ‘Thim Tin’ film in la in, sumfai cheng 50,000 leh certificate a dawng a. Pathumna chu Nuna, Vairengte ami siam ‘Murvate’ film in a dawnga, sumfai cheng 30,000 leh certificate a dawng a ni. Consolation Prize mi 3 hnenah leh Participation Prize mi 17 hnenah hlan a ni bawk.
Short Awareness Video Clip intihsiakna (3-5 minutes) hi COVID-19 hripui laka mipuite an him theihna leh inzirtir theihna emaw chu thupui a neih niin clip 21 a lut a. Lawmman pakhatna chu LDM TV Lungdai siam ‘Covid awareness’ video clip in la in, sumfai cheng 30,000 leh certificate a dawng a. Pahnihna chu  Vanlalawmpuia siam ‘Kan mawhphurhna’ video clip in la in, sumfai cheng 20,000 leh certificate a dawng a. Pathumna chu Joseph Rammawizuala siam ‘Covid awareness’ film in a dawnga, sumfai cheng 10,000 leh certificate a dawng a ni. Consolation Prize mi 3 hnenah leh Participation Prize mi 17 hnenah hlan a ni bawk.
He intihsiaknaah hian Aizawl bakah Mizoram khaw hrang hrang atangin film leh video clip thehluh a ni.

- DIPR

Post a Comment

0 Comments