Chief Minister in West Phailengah cheng nuaih sangthum chuang man sports hmasawnna ruhrel dinna tur lungphum a phum

Aizawl | December 15, 2020: Chief Minister Pu Zoramthanga chuan vawiin khan West Phailengah khawtlang leh a bik takin thalaite tana tangkai tur, sports hmasawnna ruhrel cheng nuai 3,443 chuang man dinna tur chu lungphum a phum. Residential Sports School, Community Centre leh Smart Classroom dinna tura hmalakna hi Sports & Youth Services Department kaltlanga Ministry of Minority Affairs hnuaia Pradhan Mantri Jan Vikas Karyakram (PMJVK) atanga sum hmuh hmanga hmalakna a ni.

Lungphum phumna pual hian West Phaileng GSA Playground ah inkhawm tawi buatsaih niin, Chief Minister chuan khawthlang lam chu thei leh thlai that duhna hmun, hmasawn tura theihna nei tha tak a nih thu leh tunah infiamna lamah te hmasawn belhna tur chhawp theih a ni ta zel chu a lawmpui thu a sawi a. Chief Minister chuan Mizoramin kawng hrang hrangah hmasawn theihna, opportunity a neih thu leh, a chhunga cheng mihring ten kan ngaihtuahna kan her rem thiam chuan kan thenawm state te tana entawntlak hmasawnna kawng hrang hrangah kan lantir theih thu a sawi a. Ei leh in a intodelh mai bakah hralhchhuah tur te, mihring thluak themthiamna hmang tangkaia eizawnna hrang hrang dapchhuah te, infiamna khawvelah lah ramchhung leh ram pawn pawh a lang pha kan neiin, kan la neih chhoh zel tur zia a sawi a. Sawrkarin kawng theihtawp chhuahin hma a la zel ang a, taimakna leh tumruhna in a zui chuan hlawhtlinna a awm ngei tur thu Chief Minister chuan sawiin, mahni zawna theuha kan tih tur leh tih theih te hlenchhuah tu turin mipui a sawm bawk. 
Sports & Youth Services Minister Pu Robert Romawia Royte chuan West Phaileng khua mai bakah chhehvel khua te pawhin tangkai taka an chhawr ngei a beisei thu a sawi a. Heng project-te hi a nihna tur ang taka zawhfel a nih theih nan tualchhung mipui te pawhin lo enpui a, a sak hna thawktute lo thawhpui turin a chah a ni. 
Dampa Bialtu MLA, Deputy Govt. Chief Whip Pu Lalrintluanga Sailo chuan thu sawiin bial mipuite tana tangkai leh chhenfakawm tak tur hmalakna thar din a ni tur chu lawmawm a tih thu a sawi a. Sports, Youth Affairs & Tourism Development Board Vice-Chairman Pu TC Pachhunga leh Mamit DC Dr. Lalrozama te pawh he hunah hian an tel a ni. 
Vawiin inkhawm hi Sports Secretary Pu H. Lalengmawia chuan kaihruaiin, Mizoram State Sports Council Secretary Pu John Tanpuia hnen atangin technical report ngaihthlak a ni a. W. Phaileng VCP te chuan sawrkar hmalakna chungah lawmthu an sawi bawk a, Sports Department Director Pu Lalsangliana chuan lawmthu sawiin hun a khar a ni. 
Vawiina lungphum phum tak PMJVK project pathumte hi Rs. 3,286.34 lakhs man Residential Sports School te, Rs. 140 lakhs man Community Centre (Sadbhav Mandap) leh Rs. 17.54 lakhs man Smart Classroom te a ni a. 
Residential Sports School-ah hian Academic building bakah mipa leh hmeichhe hostel, naupang 100 ve ve awm theihna tur, Multipurpose hall, Astro Football turf, principal leh staff quarters te, basketball leh volleyball court te leh RCC tuizem lian te awm tura ruahman a ni a. 1st Installment Rs. 1,478.85 Lakhs Mizoram sawrkarin a dawng tawh a ni. He school-ah hian zirlaiten an zirlai pangngai bakah Sports lamah tha taka kaihhruaina leh zirtirna pek an ni ang. 
Community Service Centre tur hi RCC building, chhawng hnih a sak tur a ni a. Basement Floor-ah Computer Room, Library, Office leh Committee Room-te dah in, Ground Floor-ah chu Main hall atan hman tur niin, Badminton leh indoor game hrang hrang atana hman theih tur a nih bakah NGO te leh khawtlangin inhmuhkhawmna atan leh Function hrang hrang neihna hmun atana ruahman a ni. 
Smart Classroom hi school thlanbikah zirlai ten tunlai thiamna (Internet Technology) hmanga lehkha an zir theihna tur atan ruahman niin, internet thlun zawmin Computer, Printer, Television (TV) te dah tur a ni a. 1st Installment atan Rs. 8.77 lakhs hmuh tawh a ni. 
Chief Minister hian vawiin hian W. Phaileng HSS leh ITI building te a tlawh nghal a ni. 
Chief Minister hian Kawrthah, Tuidam leh Mamit khua tan kar hmasa December ni 10 khan lungphum a lo phum tawh a. November ni 9, 2020 khan Lawngtlai district tan PMJVK project 14 Chief Minister hian lungphum a lo phumsak (virtual unveiling) tawh bawk a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post