Commerce & Industries minister in Kawrpuichhuah tlawh

Aizawl | December 15, 2020: Commerce and Industries (C&I) changtu Minister Dr R. Lalthangliana chuan vawiin khan Bangladesh ram nena kan insumdawn tawnna atana ruahman Integrated Check Post (ICP), Kawrpuichhuah, Tlabung a tlawh.

Minister hi Sawrkar Laipui Ministry of Home Affairs hnuaia Land Ports Authority of India (LPAI) Director (Project) Col Raman Kumar Sharma leh Assistant Commissioner, Customs Pi Neetisha Verma te bakah C&I Department atangin C&I Development Board Vice Chairman Pu C.Ramhluna, Secretary Pu P. Jawahar, Director Pu J.Hmingthanmawia, Addl Director Pu HD Lalrintluanga  ten Aizawl atangin an rawn tawiawm a. 

Minister leh amah zuitute hian ICP Trade Centre hmun Kawrpuichhuah Tlabunga ruahmanna kal mek ngun takin an enfiah a. Kawrpuichhuaha hmalakna a rang thei ang bera tih hlawhtlin anih theihnan Sawrkar Laipui Ministry of Home Affairs hnuaia sumdawnna hmun Trade Centre dintu leh enkawltu LPAI hotute nen ruahmanna an siam ho a ni. 

Integrated Check Post dinna hmun tur Kawrpuichhuah Tlabunga inkhawm tawi neihah Commerce and Industries Minister Dr R. Lalthangliana chuan  kan ram economy than len zelna turin ram dang nena insumdawn tawnna tih hmasawn a pawimawh takzet a ni tiin hemi kawnga kan hmasawnna turin Kawrpuichhuah, Zokhawthar, Zochachhuah leh Border Haat kan neihte pawh Mizoram sawrkar chuan a ti changtlung zel dawn a ni, a ti a. Kawrpuichhuah leh a chhehvel chu trade corridor pawimawh tak ala ni chho zel dawn a, hei hian kawng hrang hrangin hmasawnna ala thlen zel dawn a ni tiin he sumdawnna hmunpui ti hlawhtling tur hian Tlabung leh a chhehvel mipuite hmalak puiah a sawm a. Kawrpuichhuah kaltlanga border trade ti hlawhtling tur hian Bangladesh sawrkar a inhawng hle a ni, a ti a. Sawrkar Laipui Ministry of Home Affairs hnuaia sumdawnna hmun Trade Centre dintu leh enkawltu LPAI Director-in Kawrpuichhuah a hmun ngeia a rawn zirchiang chu lawmawm a tih thu a sawi bawk.

Sawrkar Laipui Ministry of Home Affairs hnuaia Land Ports Authority of India (LPAI) Director (Project) Col Raman Kumar Sharma pawhin thu sawiin Integrated Check Post Kawrpuichhuah tih hlawhtlin thuai chu sawrkar laipuiin a duh thu sawiin tun kar ningani 17th December,2020 hian helai hmuna hmalakna chipchiar zawka rawn zirchiang leh turin LPAI atangin consultant pahnihin an rawn tlawh leh tur thu a sawi a. Border trade ti hlawhtling turin a chhehvela cheng mipuite an pawimawh hle a ni tiin khawtlang hruaitute leh mipuite  thawhho puiah a sawm a ni.

ICP Kawrpuichhuah dinna tur hian kum 2005 khan M/s Rites Ltd. ten Home Ministry hnenah an survey report thehlutin he ICP dinna tur hian ram 224.99 bigha a zau acquire a ni a. India leh bangaldesh inkalpawhna ti awlsam tur hian Kawrpui lui (Theka) ah RCC Double Lane Bridge siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah Rs. 230.01 crores hu DPR chu January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangaldesh insumdawn tawnna kalpui theih a ni dawn a, sawrkar laipuiah bawhzui mek a ni. Tlabung leh Kawrpuichhuah inkar kawng 18km chu laih zawh ani tawh bawk a ni.

Bangladesh nena insumdawn tawn nana thil pawimawh zinga pakhat Trade Facilitation Centre chu Tlabung ah sak zawh tawh a ni a,hemi sakna atan hian Mizoram sawrkar ngenna angin Critical Infrastructure Balance (CIB) scheme hnuai atangin cheng nuai 118 chu sawrkar laipui Ministry of Commerce & Industry atanga hmuh a ni a. Tunah hian he building a taka hman theihna tur hian Mizoram sawrkarin hma la in cheng nuai 10 hmangin a chhunga hmanrua tur te lei khawm a thuam that ani tawh bawk. 

ICP Kawrpuichhuah hi a puitlin hunah chuan Bangladesh ram nena insumdawn tawnna hmun pawimawh a ni chho dawn a,mumal taka bungrua thawnchhuah leh lakluh (Export & Import) chhinchhiah a ni dawn a, chutih rual chuan ram dang atanga Dan lo anga mihring lut turte pawh uluk takin ICP ah hian endik a ni dawn a ni. He ICP puitlinna tura pawimawh tak Lunglei leh Tlabung inkar ah kawngpui (Double Lane) 100kms chu survey zawh tawh niin kawngpui tha takin Tlabung hi a pawh dawn a ni.

- DIPR