Free Animal health camp buatsaih

Aizawl | December 17, 2020:  Vawiin chawhma khan Taitesena Hall, Venglai Kolasib-ah Krishi Vigyan Kendra, Kolasib district leh College of Veterinary Sciences & Animal Husbandry, Selesih tangkawp buatsaihin ran dam lo, a thlawn a entirna hun ‘Free Animal Health Camp’ neih a ni a, Mobile based Agro-Advisory System in Mizoram,’ project ‘Ran Vulhtute Thian’ chungchang inzirtirna hun hman a ni bawk a ni.

Dr. Michelle C. Lallawmkimi, Senior Scientist & Head, KVK chuan a thlawn a ran dam lo entirna hun hawnna hi kaihruaiin Veterinary College, Selesih atanga vawk vulh dan hlawhtling tak a zirchhuak mi pariat hnenah Dr. Saidur Rahman, Head of Department, Veterinary & Animal Husbandry Extension, CVSc & AH chuan Certificate for Distant Education on Pig Farming hlanna hun a nei bawk a ni. Ran damlo 76 inentir awmin damdawi pawh a thlawnin thahnem tak pek chhuah a ni a, Dr. Lalhumliana Tochhawng, Assistant Professor chuan ‘Project Ran Vulhtute Thian’ chungchangah zirtirna a pe bawk a ni.

‘Mobile Based Agro-Advisory System,’ project ‘Ran Vulhtute Thian’ hi Ministry of Electronics & Information Technology hnuai a hmalakna niin Veterinary & Animal Husbandry Extension Department, CVSc & AH kaltlangin Aizawl, Kolasib, Mamit, Saitual leh Serchhipahte kalpui mek a ni a. Lo neitute leh ran vulhtuten an mamawh hun apianga mithiamte awlsam tak a an rawn zung zung theihna tur a ruahman a ni. Phone number 1800-102-3141 ah emaw 600975024 ah a inziahluh theih a, ran vulh leh enkawl, hri danna pek dan leh an natna enkawl dan chungchangah mithiamte nen awlsam zawk a indawr tawnna niin huan thlai leh thei chungchang thlenga rawn tur an awm reng a ni. ‘Ran Vulhtute Thian’ project hnuaiah hian heng kawng a mithiam, Level 1 Expert 3 leh Level 2 Expert 57 rawn tur an awm reng a, tun dinhmun a chhinchhiah danin ran vulhtu leh kuthnathawk mi 4000 vel an inziaklut tawh a ni.

- DIPR