Health Minister hovin Mizoram COVID-19 dinhmun thlirho; Zan curfew khauh lehzuala kalpui tha ti

* COVID-19 volunteers te lawmman tur pawh peihfel tawh, Krismas hma ngeiin pek tum an ni


Aizawl | December 17, 2020: Vawiin chawhnu khan SAD Conference Hall, MINECO ah Mizoram COVID-19 dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin Mizorama COVID-19 dinhmun thlirhona neih a ni a, I&PR Minister Pu Lalruatkima, Chief Secretary Pu Lalnunmawia Chuaungo bakah Health secretary, Home Secretary, Addl DGP leh COVID-19 dona kawnga hmalatu team hrang hrang aiawhte,  Indian Medical Association (IMA), Mizoram Kohhran Hruaitute Committee (MKHC) leh Jt. NGO Coordination Committee aiawhte an tel.




Thlirhona hun kaihruaitu Health Minister Dr. R. Lalthangliana chuan Chief Minister Pu Zoramthanga'n COVID-19 dona kawngah nasa takin tan a la a, sum lamah pawh harsatna awm lovin a inhawngb em em a, a kaihhruaina hnuaiah mi zawng zawng kan tanrual avangin tun dinhmun hi kan thleng thei a ni, a ti a. Tlawmngai taka COVID-19 dona kawnga thawktu, COVID-19 volunteers te lawmman tur pawh peihfel tawh a ni a, Krismas hma ngeiin pek tum an ni, a ti.

I&PR Minister Pu Lalruatkima pawhin sawrkar, tlawmngai pawl leh kohhran tanhona tha hi khawvel hmun dangah a awm bika a rin loh thu sawiin, hei hian COVID-19 dona kawnga kan hlawhtlinna pawimawh ber pakhat a ni, a ti a. Thingtlang lama cheng ten COVID-19 vanga harsatna an tawh loh nan MGNREGA kaltlangin ni 100 inhlawhna theihtawpa chaka bawhzui a nih thu leh kumin December thla thleng hian chawhrualin Mizoram pumah ni 90 ni 100 inhlawhna siam a ni tawh a, siam belh leh turin sawrkar laipui lamah nawr mek a ni, a ti bawk.
Vawiin thukhawm chuan hunpui lo thleng turah fimkhur a tul lehzual a ni tih sawiin, zan curfew dar 8:00 atanga tan pawh chu khauh lehzuala kalpui a tha an ti a. kan chetsual palh chuan hunpui boruak avang hian hri kai darh huk thei kan nih avangin a hma zawng aia strict leh fimkhur lehzuala sawrkar dan siamte kenkawh ni se an ti a, dawr leh sumdawnna hmuna SOP zawmlote chungah pawh khauh taka action lak tha an ti. Khawvel hmundanga zirchianna tunhnaia neihah chhungkaw inhmuhkhawmna atanga hri inkaidarh an tam tih tarlan niin, Mizorama ngei pawh hetiang case hi a awm nual tawh tih tarlan a ni a. Mipuite chu hunpui vuakvetah chhungkaw chengho nilo chu chhungkhat laina chaw eikhawm leh inhmuhkhawm buatsaih loh nise an duh thu an sawi a, chutiang bawkin thianho leh pawlho inhmuhkhawm pawh sawrkar dan bawhchhe zawnga neih loh nise an duh thu an sawi.
November thla tira Lockdown puanin a tha zawnga awmzia a neih thu tarlan a ni a, positive hmuhchhuah tharte pawh State pawn atanga rawn lut a tam zawk an nih thu tarlan a niin, contact tracing lamah pawh harsatna em em an tawh rih loh thu tarlan a ni. Pawl hrang hrang aiawha sawmte pawhin sawrkarin COVID-19 dona atana dan a siam SOP te chu tun dinhmunah a tha tawk hle a an hriat thu an sawi a, mipuite pawhin kan zawm that chhunzawm zel a pawimawh tih an sawi bawk.
Khawpui atanga hunpui hmang tura mahni khaw lama haw turte chu an haw hun bituk loh tur a ni tih tarlan niin, hripui leng laka invenna kawnga zawm tur pawimawh zingah Mask vuah chu mipuiten an zawm tha thawkhata hriat a ni a, social distancing zawm kawngah tun aia fimkhur lehzual a tul thu tarlan a ni.
COVID-19 vaccine chungchang report pek niin Sawrkar Laipuiin a dawng tur chin strict taka a rawn bithliah thu tarlan a ni a, a buaipuitu tur committee pawh State, District leh Block level ah din vek a nih tawh thu tarlan a ni. Awlsam taka pan theih sample test na tur hmun kiosks pawh hmun hnih Junior Cooperative Centre, Chawlhhmun leh Bawngkawn South Cultural Centre ah nimin atang khan kalpui tan a nih thu tarlan a ni bawk.
Zoram Medical College-ah COVID-19 positive 20 enkawl mek an nih thu leh dinhmun hlauhthawnawm an awm rih loh thu tarlan a ni bawk.

Post a Comment

He post chungchanga i ngaihdan lo sawi ve rawh:

Previous Post Next Post