CCC Part-II:Vawksa aiah Artui

Pathianni zing anih tawh phawt chuan zing chawhmeh atan vawksa aia tui hi a awm thei meuh lo chu a ni ber e. Nutling leh patling pawh insual ngam khawpin vawksa an in chuh tawh thin kha a ni a. Chuvangin, Pathianni zinga vawksa hmeh loh chu thil pawi tak a ni.

Home quarantine kan ni a, kan In thlang lane ah vawk an talh tih hre reng chung pawhin kan lei ngam si lo. Vawk pum khat chu ka ral khat atangin ka thlir liam ngawt mai a. Home quarantine chu ni lo ila, Kg 2 tal chu ka chang ve hman ngei ang le. Mahse, vanneih thlak takin kan chhungte'n min lo ngaihtuah sak hlauh mai a. A va lawmawm thin em. Pathianni zing ah vawksa kan hmeh ngei dawn le.

Mahse, tih hi a ngai leh thin. Khawmawi khua a MAHSE hotel kha an dem awm hauh lo. Inrinni a lo ni a, test turin Primary School lam panin ka sikuty MZ 07 6123 Ka khalh thla a, test hmasa pawl ka ni a. A result ah a tha lo thung a ni. Mahni result hriat hnu chuan Pathianni a vawksa hmeh pawh a lang ta meuh lo.

Covid Care Centre lam panin mahni motor ka kal a. Zan pawh tui takin ka mu a, rilru leh taksa hahdamna hun tha tak pawh a ni ngei e. Khua a lo var a, zing tin ka hmuh thin ka nupui leh fanau te hmuh tur an awm lo erawh khua a har ve hle mai. Pathianni zing a ni a, zirtawpni zing a vawksa kha rilru ah a lo lang, CCC ah pawh vawksa kan hmeh ka lo beisei viau a. Mahse, vawksa aia Artui kan hmeh ta zawk si a. Kan In ah chuan nise vawksa kan hmeh ngei dawn tih ka chiang, rilru a vawksa hre reng chungin Artui chu tui ti takin ka ei a. Chaw ei erawh ava harsa tak em.

- Elvis Zuala

Post a Comment

0 Comments