CCC Part-III:POSITIVE MIND TI VE TAWP ANG

Triple C a awm te ta
Ka thupui ah hian sap tawng ka han hmang ve ngawt a. Sap tawng in ka zawm thiam leh si lova, a chhiartu tam zawkte hriatthiam theih turin ka han ziak ve leh ngawt mai teh ang. A thupui pawh hi a sawifiah zo lem lovang, mahse a chhiar tu ten in ngaihtuah ngei ang le. Covid-19 positive lo nih takah chuan rilru pawh a positive tur ani, tih ngawt hi a ni thei chiah bik lo. Rilru leh ngaihtuahna a kal thui duh khawp mai. Mahse, tawngtaina thawm chuan negative rilru min paih sak a, positive rilru min neih tir leh si thin. Covid-19 positive aiin negative nih a tha a, positive nih tawh hnu ah chuan negative mind neih aiin positive mind neih a va tha thung... ngaihtuahna positive se, result lo negative thung se.

Sir Winston Churchil-a khan *a thim zawnga thil thlir  thin mi chuan hun remchang zawng zawng ah harsatna an hmu thin a. A eng zawnga thil thlir thin mi chuan hun harsa ah pawh hun remchang an hmu thin* a ti a. Tun hun tak mai hi Covid Care Centre a awm te pawhin remchang kan lak thiam ava pawimawh tak em. Covid care centre ah mi thenkhat chu thla hnih dawn an awm a, thenkhat te chu thla khat dawn an awm bawk a, thenkhat te chu an awm atanga ni 10 hnu a Covid Care Centre chhuahsan ta te pawh an awm ta nual mai. Anih chuan Covid-19 positive i nih avang khan i positive reng dawn lo tih hre reng chuangin a eng zawngin i hmalam hun thlir hram hram ang che. Kan lam a tang hi Pathian ani tih kan hriat reng ava tha em.

Covid Care Centre atang hian Pathian kan au a, kan tawngtai a ni lawm ni. Kan tawngtaina hi chhan in a awm ngei dawn tih hria ila, mahse engtik hun ah nge a chhan dawn tiin a thim lam zawng in engmah ngaihtuah suh ang che. Keini ho in theihtawpin Pathian kan au a, In lama kan chhung lehkhat, thenrual te leh rawngbawl pui te'n dam taka Covid Care Centre kan chhuah theihna turin Pathian an au asin, chuvangin, kan positive ta rau rau chu *Negative leh tumin Positive mind* nei ila. A thim lam zawngin engmah ngaihtuah lo in a eng lam zawng zel in aw ni ang. Tun hun hi i tan, ka tan min hnaih rawh u ti tu Pathian kan hnaih theihna hun remchang tak ani tih hre reng ila. A eng lam zawng zel in rilru leh ngaihtuah i nei zel ang u.

- Elvis Zuala

Post a Comment

0 Comments