Aizawl FC in i-league khel turin Kolkata pan

Aizawl | December 26, 2020: Vawiin khan Aizawl FC Coaching Staff leh Players 39 te chuan nakum 2021 January ni 9 atanga football inelna pawimawh, I-League a tel turin Lengpui Airport atangin Kolkata an pan ta a. Sports Minister Pu Robert Romawia Royte in a vailiam.

Tun season I-League hi Covid 19 avanga tan tlai a nih bakah a khelh dan phung pawh tihdanglam a ni a. Home and Away system-a zin kual reng a rem loh avang leh ISL pawh hmun khatah, Goa-a khelh a ni mai ang hian I-League pawh Kolkota-ah match zawng zawng khelh a ni dawn a ni.

Covid Hripui avangin Aizawl FC player te pawh thla 2 dawn pawn lam hmun dangah chhuak lovin RG Stadium-ah an inkulh a. AIFF dan anga RT PCR tests te an paltlang hnuah vawiin khan Kolkata hi an pan ta a. AIFF dan angin Kolkata Hotel-ah Ni 7 chhung quarantine an ni ang a. January ni 2 atangin practice an țan ang a. January ni 9-a an khelhpui hmasa ber tur chu Minerva Punjab FC a ni.

     

Aizawl FC te thlahna ah hian thu sawiin Sports Minister Pu Robert Romawia Royte chuan hun rei tak atanga a lo nghahhlelh em em, ramdang mi 3 te bak, Mizo tlangval hlanga I-League-a Aizawl FC che vel thlir theih a ni tur chu a phurawm tak zet a ni, a ti a. Football infiammite chu Pathian tanpui tlaka an nundan uluk tur leh nasa taka thawkrim turin a fuih a. Aizawl FC chuan infiammi a neih țhat bakah Coach leh Manager a nei țhat thu sawiin champion ngei kan tum tur a ni, a ti a. Infiammi te chu 5-Star hotel-ah thla 4 dawn an khawsak dawn avangin a lawmpui thu a sawi a, AIFF leh Club-in duhsakna a pek avanga lawm thiam tur leh I-League an khelh tur chu ram leh hnam tan a nih rualin anmahni mi mal hmakhua atan a pawimawh zual hle dawn a ni, a ti bawk.

     

He hunah hian Pu H.Biakzaua, Lawngtlai East MLA leh Aizawl FC Board Member ni bawk bakah Pu C.Rongura, EM, LADC leh AFC hotu dangte pawh an tel a. AFC BoG leh MLA ni bawk Pu H.Biakzaua pawhin thu tawi sawiin AFC Players te chu hotute thu awih tur leh theih tawp chhuaha bei turin a fuih a, Team tana tawngtaisakna hun a hmang bawk.

 

Tun season 2020-21 ah hian I-League-ah Team 11 an awm a, a champion chuan Trophy leh Medal bakah cheng nuai 100 dawngin Asian League-ah an kaisang thei dawn a ni. April 2021-ah I-League hi zawh fel hman tur a ni.

- DIPR