Aizawl | December 26, 2020: Environment Forest & Climate Change Minister TJ Lalnuntluanga chuan vawiin khan Khawbung RD Block huamchhunga hmun pawimawhte a tlawh. Minister hi Khawbung BDO Pu Benjamin Zalawma Ralte leh khawtlang hruaitute'n an lo dawngsawng a ni.
Hla Kungpui Mual Khawbung a tlawhnaah Pu T.J Lalnuntluanga chuan Khawbung leh a chheh vel chu khualzin hiptu tha tak tak tamna a nih avangin Mizoram sawrkar chuan Eco-Tourism lamah project-te siama hmalak chhoh a tum tih a sawi a. Mizo Hlakungpui Mual ngaw leh ram hmul, nauban humhalh dan chungchangte BDO leh khawtlang hruaitute sawipuiin Minister chuan hripui avangin Mizoram sawrkarin hmalakna tur ruahmanna a neih sa pawh duh angin a kalpui chak thei lo niin a sawi a, boruak a that velah chak zawka hmalak theih a inbeisei thu sawiin Khawbung leh a chheh vela hmun pawimawh tak takte chu tlawhnahawm zawka a awm theihna turin Eco-Tourism lama hmalakna tur ruahmanna pawh siam chhoh mek anih thu a sawi bawk.
Forest Minister chuan khaw hrang hrangin ngaw tha tak an humhalh chu lawmawm a tih thu sawiin, a tam thei anga ngaw siam turin a chah a. Khawbung khawtlang hruaitute chuan Tuiaw zaua Khawbung Vanzau leh Bungzungte'n Sazuk an humhalh chu inthlahpung chho zelin kumina Tuiaw zaua thlasik thlai chingtute thlai a eisak chungchanga harsatna an neihte leh mamawh dangte an lo thlen a ni.
Minister hian vawiin vek khan Tuipuirala hmun pawimawh thenkhatte a tlawh kual nghal a ni.
- DIPR
Post a Comment
He post chungchanga i ngaihdan lo sawi ve rawh: