Vairengte naupang bo la hmu lo!

Aizawl | November 13, 2020: Vairengte Hmar veng naupang bo kum hnih leh a chanve Lalsiamthara chu ni hnih leh zan hnih zawn a nih hnu-ah, tukin thleng khan hmuh a la ni lo.


Nimin piah zing dar 7 vel atang khan Lalsiamthara kum 2 leh a chanve mi Pu C. Zothanmawia fapa Vairengte Hmar veng chu chin hriat lohin a bo a, Mipuiin an zawng mek a ni.

Naupang pa Pu C Zothanmawia hi Auto Rickshaw khalh thin a ni a, tunhnaia Cachar lamin kawng an danpin avangin petrol a harsa hle a. Mi petrol lei tumin Vairengte Aouto stand atanga tlak lam mual letliam lamah a fapa Lalsiamthar leh an thenawm mipa naupang kum 9 vel mi te nen Auto Rickshaw in an kal a. Mi huan thlam hlui pakhatah a naupang hruaite pahnih chu "Lo awm lawk rawh u" tiin a kal san ta a ni.

Mipa naupang pahnihte hian marble te an lo khel dun a, kum 9 mi zawk chuan a nau chu "lo awm lawk rawh" tiin a bul hnai deuhah a inthiar san a. Lalsiamthara chuan tap chungin a rawn pan a, "Lo kal suh, i pa bulah lo va kal rawh" a lo ti niin an sawi. A inthiar zawh chuan a nau chu a hmu ta mai lova, naupang pa Pu C Zothanmawia a rawn thleng a, a ni pawh chuan a hmuh bik loh avangin an mangang ta hle mai a. A bo tanna bul maia huan kal midangte chuan naupang tap thawm an hriat thu leh a tap thawm an hriat chhung chuan a kal sawn lo nia an hriat thu an sawi a. Chung mi te nen chuan an thawm hriatna leh a chhehvel te an dap nghal a, midang punin nimin khan a hria apiang naupang bo zawngin an chhuak khawm nghal a. Nimin nileng leh zankhuaa an zawn hnuah pawh an hmu zo ta lo a ni.

A bo na mual hi mual dung sei tak mai a ni a, kawng hlui tha lutuk lo awmin he mual hian Dholai bul thleng a pawh a ni. He kawng hi a zawh zel a nih beiseina nen kawng dung leh a chhehvel ramhnuaite an dap nasa hle a, Cachar lam mi thenkhat ten naupang tap thawm an hria tih sawi thawm awmte an chhui zui zel bawk a, engmah hmasawnna erawh an nei thei ta rih lo a ni.

A pain a hnutchhiahna thlam atanga hla vak lovah sangha dil a awm a, bei nge sei rundung tiin nizan khan dil chu sah kang a ni a, an beisei erawh an hmu lo.
Vawiin lamah hian Vairengte khawpui chhung branch 4; Hmar veng, Venglai, Kawngthar veng branch leh Hall veng branch te mibo zawngin an thawk chhuak leh mek a ni.

Post a Comment

1 Comments

He post chungchanga i ngaihdan lo sawi ve rawh: