Cooperation Minister hovin thlai man sang chungchangah meeting; ruahmanna siam turin Vegetable Supply Chain Committee ruat

Aizawl | November 13, 2020: Nimin khan Cooperation Department Minister Pu C.Lalrinsanga hovin tun hnaia thlai man sang thut avanga mipui ten harsatna an tawh te sukiang turin meeting neih a ni. Minister hi Cooperative Development Board Vice-Chairman Pu H.Biakzaua leh Horticulture Development Board Vice-Chairman Prof. F. Lalnunmawia ten an tawiawm a ni.


Cooperation Department Minister Pu C.Lalrinsanga chuan tun hnai ramri buai avanga Mizorama motor lut tur hun engemaw chen dan chah a ni karah leh COVID-19 hripui leng kara loneitu (farmer) ten man tlawm taka an thlai thar an hralh laia kharchhawng (middleman) ten man sang tak tak a, har sa leh rethei zawk-consumer tam takte ngaihtuah lo a thlai man an ti sang chu, an dem awm a ni a ti. Lockdown hmasa lamah veng leh khaw thenkhat thahnemngai ten a thlawna an thlai thar te an sem chhuah te kha mizo zia diktak a ni tiin a sawi a. Amaherawhchu, tun hnai lockdown-a thlai man sang ta thut erawh mizo zia kan kalsan ta deuh em ni tiin a sawi. Sawrkar chuan thlai man to ta thut hi pawi a tiin, loneitu te leh consumer te insuihzawmna tha zawk ruahmanna siam a ni ang, a ti a. Minister chuan mipuite harsatna sukiang turin state danga an lo kalpui tawh- Aapna Mandi, Rythu Bazar te zirchianga, Mizoram-ah introduce theih a nih nan hmalak a nih tur thu a sawi bawk a. State dang atanga a tlem thei ang ber thlai thar lak luh a nih theih nan, intodelh a pawimawh a, hemi atan hian sawrkar department hrang hrang tan ho (cooperate) a ngai a ni, tiin a sawi.

Meeting hian tun hnaia thlai thar sang ta thut chungchanga a tul anga ruahmanna lo siam turin Vegetable Supply Chain Committee ruat ni se tih pawm a ni a, he committee member te hian naktuk-ah meeting an nei ang. Thlai hralh chungchanga kalphung thar, MIZOFED, MAHFED te nen tang kawpin ngaihtuah leh ni se tih rel a ni.

Meeting ah hian Horticulture Department, Trade & Commerce Department, Agriculture Department, Food & Civil Supply Department aiawhte leh midangte an tel a ni.

Post a Comment

0 Comments