Tuna Mizoram-Assam state border dispute chungchang ah hi chuan Mizo mipuite kan che țha em em a, Zofate inpumkhatna pawh a lang chiang em em a ni. Mahni ram leh hnam chhan nan chuan kan nunna pawh kan thap ngam tih a chiang a; tin kan zahawmna venhim nan rilțam deuh zawk leh khawsak harsa deuh zawk a awm rih pawh kan inhuam hle a. Hei hi Mizoram sawrkar pawhin a hmuchiang a, engemaw chen chu mipuite duhdan a kal pawh a tum ve hle niin a lang a, Assam ni lo state dang nen kan inkalpawh theih naturin kawng pawh a cheițha ve nghal rum rum a. Sawrkar hi Silchar a Mizo driver te an danbeh rei lutuk chungchang ah demawm hle mahse fak natur chu a awm ve tho a nih chu.
Tin, Silchar a Mizo driver te leh an tank lorry a an oil phurh te, an gas phurh te nen lam hian Mizoram Police zuk escort chhoh luihtir mai hi Mizo mipui tamtakin kan duhdan ni in kan sawi a. Chu chuan Lailapur a civilian kawng dangpingtute leh anmahni support a kaihruaitu Assam police te erawh an rawn tawntlang chhoh theih a ngai dawn a. Mi state chhunga law & order a inrawlh lui kan nihna chin a awm thei dawn a ni (Law & order problem awm sa ah lehnghal). Brig T. Sailova te'n an hunlai a BSF tir a Silchar a Mizo tangkhang an hruai chhuah thu leh stone pelter pakhat an kahhlum thu te kan sawi a. Mahse, tunah chuan mihring chauh hruai haw tur kan ni lova, tank lorry full load, gas phur full load te a ni kan hruai haw tur. Tun țum danglamna hi chu oil leh gas phur tan chuan geletine tlawn khat chu sawi loh, halpuah tlawn khat lek pawh a hlauhawm ve thei tlat a ni.
Mizo mipuiin kan border hnaih, Mizoram chhunga Mizoram Police/IR te kan dah (deploy) na hmun ațanga hnuhdawh kan phal tawh lova, chu chu hriain Mizoram sawrkar pawhin official pawhin a dinpui ve ta zel rih a. Chuvangin, Assam lamin Mizoram luhna National Highway an dang ping ta a ni.
Assamese ho hian Mizoram lifeline NH 306 Lailapur a an dan nachin hi chawlhkar hnih deuh thaw a ni ta a, keini lahin state dang ațangin mamawh kan la lalut tak tak thei chuang hek lova. Damlo tamtakin an damdawi an nghei tawh a, Mizoram ah ei leh bar leitur a tlem a, thlai man a to em em mai a ni. Mahse, Zofate chuan "Assamese ho chuan kawng chu dang reng rawh se, kan tuar ang a kan tuar chhuak bawk ang", kan ti ve reng a. Vaiho hian kawng hi an danpin rei chuan anmahni ngei khu in lungrual loh phahin an in vaw duh mai turte pawhin kan ring a, a țhen phei chuan Mizote ai a an tawrh nasat zawk te pawh kan ring a ni. Chutiang chu kan in zirtir zel bawk a ni. Mahse, han hawi kual vel teh. Ni 8 Nov 2020 ah Manipur ațanga petrol leh diesel han phur tank lorry 3 velin Aizawl an rawn thleng a. Chawhnu lam a WhatsApps, Facebook, Instagram ah te chuan mipui lam chuan nimin lam a tawrh hram hram kan tumna kha kan theihnghilh leh tlangpui tawh a; POL leitur kan chan loh avang te, Petrol pump lamin an free sale loh avang te in kan phun mur mur țan tawh a. Sawrkar kan sawichhia a, keimah ni leh keimahni hi invuak kan châk hmel zawk ta hliah hliah mai a ni. Petrol pump lamin "NO PETROL, NO DIESEL", tih an tar te chu khawvelin min hmuhpui theih turin social media ah kan post chuai chuai a. Tichuan, Chakma leh Tuikuk te'n minrawn nuihzat ve leh chhawng lui a, kan thin a rim leh em em bawk a.
Ram leh hnam thil a ni a, damlo te pawhin kan dam ve reng nan a enkawlna kan dawn ngei ngei ngai dawn theih loh phah mek te zing a mi ka ni. Mahse, assamese ho hian kan ei leh bar lakluhna hi kumkhat dang leh pawh dang tlat mahse pawi tihna kei ka nei lova, chu chu mipui tamtak duhdan pawh a ni tawh zawk a ni. Assam state lam hawi loh theih hram kan duh ta hle mai.
Mahse, sawrkar hian tihtur a nei ve. A chang chuan thil țha zawk leh remchang zawk ngaihtuahin sawrkar hian a mipuite rilrem zawng ni chiah lova thutlukna siam a hma a lak a ngai ve țhin tho a ni. Sawrkar chuan a mipuite zinga rilțam phun reng te, mihuaisen tak tak te, mi lungawi miahlo te, mi lungawi em em te, damlo te, dam em em te pawh a ngaihtuah tel vek a ngai a ni.
Tunah hian Mizoram Mizote hi thlai man to avang leh petrol/diesel awm loh avangin zahthlak khawpin social media ah kan phun nasa hman der tawh a ni. Inter-state border dispute lah chu thla hnih thum chhung lek a chinfel theih a lo ni der bawk si lo nen. Tripura lah kan tan friendly state a lo ni bawk si lo. Kan dinhmun ațanga tawlh vak si lova tun hun atan a remna zawnga mawihnai taka talchhuah dan, GRACEFUL EXIT zawn thiam mai hi sawrkar pahnih tan chuan a pawimawh rih a ni. Thil țhaber ai a a țhaber dawttu a kan lungawi mai a ngaih țum te a awm a, kan duhdan ni si lo, kan mamawh dan zawk a thutlukna kan siam a ngaih chang te a awm ve bawk țhin. Central sawrkawr (MHA) hmalakna angreng deuh a Mizoram leh Assam Chief Secretary te ni 8 Nov 2020 a inremna lailawk an siam kan hman țangkai chhung hian nasa takin state dang leh ram dangte nen a inkalpawhna kawng țha neih tum ila, insumdawn tawnna țha neih tum ila, kan ram hi inchi khat pawh hloh kan phal loh a kan tum loh em mai hi. Assam state assembly election lah nakum April thla ah daih a la ni bawk si a.
November 8, 2020
( A ziaktu kan biak pawh theih loh vangin zah tak chungin kan dah a ni e.)
Post a Comment
He post chungchanga i ngaihdan lo sawi ve rawh: