MZP Headquarters Lunglei in Zirlai tiṭha chawimawi;

Aizawl | November 13, 2020: Vawiin chawhma khan Cultural Heritage Center, Venglai ah Mizo Zirlai Pawl Headquarters Lunglei buatsaih in Mizo Zirlai Titha Chawimawina hun hman a ni. He hun hi B.Sawmliana Vice President MZP Hqrs. Lunglei in a kaihruai a. Pu Lawmawma Tochhawng, Vice Chairman High Powered Committee chu Khuallian a ni.




He hunah hian Lalpeksanga Chenkual President MZP Hqrs. Lunglei chuan thusawi in Mizo Zirlai Titha Chawimawina hun chu MZP in kum 2009 atangin kumtin a buatsaih thin thu a sawi. September Ni 4 ah  Saizawh West a kan unau te Takam (Chakma) ten kut an thlak avangin MZP te an thlavang hauh turin an kal thu a sawi. MZP te ngenna avangin pawikhawihtu chhungkua leh CADC a CEM ten Rs.50000 (Sing Nga) ve ve in zangnadawmna an pek thu a sawi bawk. Kan chenpui hnamdang chunga that kan chhuah em em laia hnamdang te kut kan tuar leh fo thin hi MZP chuan pawi a ti takzet a, hetiang hi a thleng nawn leh a nih chuan MZP in hma a la zel dawn a ni a ti.
Mizoram leh Assam ramri a buaina thleng chu Zofaten thanharh nan hmang se a duh thu a tarlang a. Ramri buaina ah hian Party leh NGO pawimawh bik an awm lo a, kan tanrualna a pawimawh ber a ni a ti. Sorkarna chelh mektu te chu dinhmun pawimawh taka ding an nih angin kan pi leh pute sah zau sa kan ram humhalh zel turin a ngen. Ramri humhalh nan nunna thap leh thisen chhuak hiala beitu te chu MZP Headquarters Lunglei chuan zahna chibai a buk takzet a ni. MZP in ILP Check a kalpui thin dan tarlang in Mizoram chhunga hnathawk tura hnamdang chhawr chungchangah Mizo te chu a dik lo zawka tang kan nih thin vangin hnamdang chhawr leh sponsor chungchang ah hnam himna a nih hre renga fimkhur lehzual turin mipui te a chah a. Hetih rual hian Mizo Customary Law Bung 3 chang 73 na in Mizo hmeichhia hnamdang pasal nei chu an pasal te hnam ah an lut a ni a tih angin Mizo thalai leh zirlai te chu hnamdang nei lo tur leh zirtirtute pawh hetiang zirtirna hi ngai pawimawh zel turin a duh thu a sawi bawk.
President chuan MZP chu Zofate inpumkhatna ngai pawimawhtu pawl a nih angin Zo hnahthlak te intawhkhawmna hun ZO Fest a buatsaih thin a ni a ti a. Mizoram chhung a cheng chauh te hi Mizo te an ni lo a, hmun hrang hrangah chi peng hrang hrang kan cheng a, in enhrang mai lo a inpumkhat a tulzia a tarlang bawk. Zirlai hlawhtlinna chang te chu an lehkha an zir chhan hrechiang turin a chah a. Mahni chhungkaw tan mai zir lo a khawtlang, ram leh hnam tana lehkha zir chu hlawhtlinna rah tha ber chhuahtu a ni a ti bawk. Ram danga hnathawk tam apiang te chu ram changkang an ni thin a ni a, ram danga hnathawk thei tura zirna hmachhawn thei turin zirlai te a fuih. Tun hnaia Central Service a inziak tling an awm ngai ta lo chu veiawm a tih thu a tarlang a, Direct-a Central Service a inziah tlin tum tak tak zirlai Mizoram in a mamawh thu a tarlang bawk.


He huna khuallian Pu Lawmawma Tochhawng Vice Chairman HPC chuan hlawhtlinna chang te a lawmpui thu a sawi a. Zirlai ni mek te chu an zir chhan mahni theuh lo inzawt tur leh tum mumal tak nei a zir an ni em tih infiah turin a chah a. Tute emaw thawhchhuah sa ring leh hlawh la tu mai ni lo a hlawh pe tu, mahni ke a dingchhuak nih tum turin a fuih bawk. Lehkha zirna kawngah an hma a lum a nih anga zir mai lo in enge maw tak nih tuma zir fan fan tura a duh thu a sawi. An zirlai leh an hnathawh chu khawtlang leh ram tan a ni tih hriaa Pathian rawngbawl an nih inhre reng chunga zir tur leh hnathawk turin zirlai leh zirtirtu te a chah bawk. Zirlai te chu tum mumal tak neia zir turin a chah a, hna hniam leh sang bik a awm lo a ni a ti bawk. Ram leh hnam dinchhuah nan zirna hi a pawimawh ber a, zirlai te chu hlawhtlinna an chan theih nan kohhran leh khawtlang hruaitu ten lo hrethiam thin tura a duh thu a sawi bawk.

He hunah hian HSLC a 9th (pakuana) K.Lalruatkimi chu Citation leh Zomawi Bakery in Cake bakah Dengro Award, kumtin Lunglei atanga HSLC a titha ber hnena hlan thin Rs.10000 hlan a ni bawk. Jr. Grade of Mizoram Engineering Service (Civil Engineering) a 1 (pakhatna) R.Lalnunpuia s/o R.Ropianga Chanmari leh Jr.Grade of Mizoram Engineering Service (Asst. Architect) a 1 (pakhatna) David Lalremruata s/o R.Ngurnghinga, Salem Veng te chu Chawimawina thuziak hlan an ni a. HSLC a Distinction a Pass mi 67 leh HSSLC a Distinction a Pass mi 17 te chu Lawmpuina thuziak hlan an ni bawk.

Post a Comment

0 Comments