MZP in Mamit DC leh Karimganj DC inremna hal

Aizawl | November 1, 2020: Vawiin chhun khan Mizo Zirlai Pawl (MZP) general headquarters chuan nimina Mamit DC leh Karimganj DC inremna chu pawm lovin, an pawm loh zia leh duh loh zia lantir nan Vanapa Hall kawtah an hal.


Mamit DC leh Karimganj DC hi nimin khan Karimganj district chhunga Isabeel Tea Estate ah inbiain, hetah hian Medili lei leh a chhehvel khua chu Assam chhung a nih thu leh Mizoram Police te hnukkir turin Karimganj DC hian a ti a, he rawtna hi Mamit DC lam chuan pawmin, a hun tur tak erawh an la tihchian theih loh thu tarlan a ni.


MZP chuan Mamit DC leh Karimganj DC inremna hi Mizo leh Mizoram tan tlawm thlak-ah an ngai a, nakin zelah Mizoram tana thil tha lo thlen theitu nia ngaiin an hal ta a ni.

Mizoram leh Assam ramri buai chungchang-ah nimin khan Ischabeel Tea Estate, Karimganj-ah Mamit District Bawrhsap Dr Lalrozama IAS,  leh Karimganj district DC Anbamuthan MP, IAS  te an inbia niin sawrkar thuchhuah chuan a tarlang.

Nimina inbiakna chuan, Ramri-a remna leh muanna a awm theihna turin thawhhona tha tak nei chungin hmalakna kalpui nise tih a ni a. State pahnihte hian an mahni huam chhung ve ve buaina a awm lohna turin hmala se tih an ni.
Mamit leh Karimganj thuneitute hian Motor veivak te pangngai taka an kal leh theihna turin leh a bik takin Essential Commodities phurtute, LPG leh a dangte chu khawi lam ve ve atang pawha dodalna awm lova an kaltlang theihnan enpuia hmalak nise tih a ni bawk.



Nimina ramri chungchang sawihona hunah hian Mamit District atangin SP, Mamit, DFO Kawrthah, SO, LR&S/SDO (Sadar) Mamit, SDO(Civil) Kawrthah bakah DIPRO Mamit te telin. Karimganj District atangin SP, ADC, DFO, Circle Officer bakah Officials dangte an tel a ni.








Post a Comment

0 Comments