MSU in Mamit leh Karimganj DC inbiakna minute hal; Mamit DC leh SP sawn phut

Aizawl | November 1, 2020: Mizo Students' Union (MSU) General Headquarters, chuan vawiin chawhma khan Mamit DC leh SP ten nimin ni 31 October 2020 a Karimganj DC te nen Mizo mipui duhdan kalha meeting an lo nei duhlohzia lan tir nan Chief Minister Bangla kawtah  meeting minute an hal a, Mamit DC leh SP sawn chhuah an phut.


He hunah hian MSU Vice President J Lalmuanzuala chuan thu sawiin, "Mamit DC leh SP te hian Zoram mipuite duh dan ni lo leh remti lo chunga Karimganj DC meeting a zuk neihpui hi kan dem hle a ni" a ti a.
"Meeting minute-a an agenda pakhatnaah hian Mizoram Police Force te Mizoram chhung ngeia an duty chunga Assam atanga an in withdraw dan tur sawiho tura chhawpchhuah a ni ringawt pawh hi MSU chuan a duh lo hle a ni. Meeting minute-a a lan danah hian Karimganj DC hian vawi engemawzat Mizoram Police Force te an in withdraw tur a ni tih a sawi chunga Mamit DC in a chhanletna engmah a awm ve lo hi a pawi kan ti a. Mamit DC Dr. Lalrozama IAS hi kan ram chin hum turin a tawngchhuak ngam loah kan ngai a, MSU chuan thinrimthlak a ti takzet a ni." a ti bawk.


Pu Muana chuan "Ramri dep District-a hotu lu ber ni tur hian DC Dr. Lalrozama, IAS leh SP Shashank Jaiswal, IPS te hi MSU chuan an tling tawk loah a ngai a, chuvangin Mamit DC leh SP nilai mek te hi darkar 24 chhunga sawn chhuak nghal turin sawrkar kan ngen a ni" a ti bawk. Thu a sawi zawh hnu hian meeting minute hi a hal chhunzawm nghal a ni a. Hemi rual hian MSU District Headquarters, Mamitah pawh President Pu Vincent Lalpiantluanga hovin Charkawnah Meeting minute halna hun hi hman a ni bawk a. Pu Vincent-a chuan "Ram leh Hnam thila mipui kan buai laia a ruk a rala kan do ber te meeting lo neihpuitu DC leh SP kan nei hi a zahthlak kan ti a, Mizoram tanhmun tha tak an ti phet a, a tirtu sawrkar pawh an demawm hle a ni." a ti.

Mamit DC Dr.Lalrozama IAS leh SP Shashank Jaiswal IPS chu sawn chhuak nghal tur leh an aiawh dah vat tura ngenna Chief Minister hnenah an thehlut nghal bawk  niin MSU chuan thuchhuah siamin a tarlang.

Post a Comment

0 Comments