MZU BA (Education) Topper leh Lemziak thin Remremi Hrahsel

MZU B.A Education Topper leh Lemziak thiam Remremi Hrahsel kan belchiang.


Remremi Hrahsel tia  hriat thin, Janet Lalremsangi Hrahsel hi a thianten Remrem emaw Janet emaw tiin an ko thin.

Remremi Hrahsel hi H Lalngurkhuma leh Lalthlanmawii te fa pathum zinga naupang ber niin, May 25, 1997 khan a lo piang a. An uanau hi pathum niin, Mi pakhat leh hmeichhia pahnih an ni.

View this post on Instagram

Éternellement jeunes 👻

A post shared by Janet Lalremsangi Hrahsel (@remremii_hrahsel) on 


Remremi Hrahsel te hi Mission veng, Aizawl-ah chengin an khawsa a, Presbyterian Kohhran niin, Biak In pui-ah an lawi. 


A. Lemziah i tui tan hun leh tui tan dan:
- Lemziah hi ka hriat theih chinah, kum 3-4 vel ka nih lai atang tawh hian nuam ka ti tawh a, ka pianpui tuina thil a ni ber ang chu.


B. Eng lam nge ziah nuam i tih ber?
- Ka naupan lai chuan scenery te, cartoon characters ang te hi ziah nuam ka ti thin a. Amaherawhchu, ka rawn upa chho a, hunawlah te scenery emaw abstract lam te ka tih ve zeuh zeuh tih lohvah chuan realistic portrait lam hi ka tui ber.


C. Lemziak tura nawr thintu che?
- Lemziak tur hian a hranpa chuan turtu em em ka nei lo a, keimah hian nuam ka ti a, han thai melh melh hi nuam ka tih thin mai bakah abstract art lam phei chu ka rilrua thil awm chi hrang hrangte phochhuah nan ka hman thin avangin ka ngaihlu a, ka nuna thil thleng te dahthatna atan ka hmang a ni.


D. Lem ziah nana i hun hman tlangpui:
- Ka lem ziah hun hi ka lem ziah tura zirin a inang lo vek a. Amaherawhchu, a tlangpuiin portrait pakhat ziah nan hian ni khatah darkar 5 te ka hmang a, ni 2-4 te ka hmang thin.

E. Lemziah hi nuam i ti em?
-  Lemziah hi nuam ka ti lutuk a, ka hobbies te zing ami a nih rualin ziah peih thlawt loh changte chu ka ngah ve lutuk tho a ni.


F. Lemziah hi sum lakluh nan i hmang tawh em?
- Ka tleirawl tirh deuh hian official taka puangzar chuang lem lo hian hmelhriat thate lem hi man deuh hlek hian tlem a zawng chu ka lo ziah sak tawh a mahse mi nazawng ka ziah sak ngai lem lo. Amaherawhchu, nikum vel atang khan pangngai takin side income atan ka hmang tan.


Zirna lam:
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum?
- Kg 1 hi ka pa hnathawhna avangin Champhaiah Rose Land ah ka kal a, chuan Kg 2 atanga Class 8 hi English Congregation ah ka kal bawk a. Pathian khawngaihna leh malsawnna zar liau liauah sikul ka kal lai hian rank holder hi chu ka ni ve thin a, pakhatna ka nih loh chuan top 5 ah hi chuan ka lang chho tlangpui. Class 9 leh 10 hi Synod Higher Secondary School ah ka kal a.. SHSS-a ka luh lai hi chuan High school lut tir ka ni bawk a, lehkha kha ka zir ngawrh vak lo a, a thra berah top 10 ah bak ka lang ta lovin ka hria.

2. Pawl 12 hi khawi atangin nge i pass? chuan, engah nge, a kum nen?
- Pawl 12 hi Home Missions School atangin ka zo a. Class 12 ka zir lai hian vanduai thlak tak maiin rilru lamah damlohna ka nei ve a, exam dawn hnaihah phei chuan ka zir thei lo tawp tluk a ni. Zir buai vak kha ka tum ta lo tawp a, repeat tum rilruin ka exam a, 2nd ah ka pass ta a. Mahse, ka repeat ta chuang lo. 2016 ah 12 ka pass.

3. zirna sang zawk i zir leh i zirna hmun leh kum?
- Pawl 11 leh 12 ah khan Science student ka ni a, keimah tak hi chuan engineering zir tum ka ni a, kha vang khan JEE exam tumin kum khat ka awl a, amaherawhchu Pathianin ka kawng tur a lo duan fel vek mai a. Ka tum lawk ni miah lovin PUC-ah 2017 khan Arts-a inleta Education core turin ka lut ve a, kumin khan B.A Education hi ka zo a ni.


# I lehkha zir dan?
- Lehkha hi zantin zir chet chet an tih ang kha ka ni lem lo a, engemaw changin ka ennawn zeuh zeuh a. Amaherawhchu, internal test/exam dawn atranga kar 2-3 atrang hi chuan rilru pe thei ang ber hian ka zir ve tawh thin a ni. Thawh hma lam hi ka tih mi loh ve em avangin zing lamah hi chuan ka zir ngai vak lo a, chhun, tlai leh zanah hian ka zir tlangpui.




# Harsatna I hmachhawn dan?
- Eng harsatna pawh hi tawk ila, a hmasa berah chuan Pathian hnenah hian ka thlen thin a. Tichuan, ngaihtuah ngut ngut loh te ka tum a, ka rilru lak pen nan ka nuam tih zawng(hobby) te hi ka ti nasa thin.

Topper i nihna (Subject) leh CGPA?
- B.A Education, 8.93

MZU B.A Education Topper ni tura i beih dan?
- Ka lehkha zir dan tak chu a chunga ka tarlan tak ang khi a ni nai ta a. Internal test leh exam kan neih dawn reng reng hian midang el ai hian keimah leh keimah hi ka inel thin a, marks chumi khami zat chu ka hmu ngei ngei tur a ni tia in challenge chung hian lehkha ka zir thin a ni.

(Website a fakna hi lo hmet ve rawh.)

MZU B.A Education Topper ni tura i beihnaah faculty lamin an ṭawiawm/pui ṭha chein i hria em?
- Aw, kan lecturers te hian kawng engkimah min duhsakin min fuih nasa em em a, ka hlawkpui tur thil chi hrang hrangte min hrilh nasa em em a, zawhna neih apiangin min hrilhfiah turin an lo inhawng em em mai zel a ni.

I zirna atana i chhungte pawimawhna:
- Ka chhungte hian ka zirna kawngah hian min support em em a, ka nu leh ka pa hian zanrei deuha lehkha ka zir te chuan ka taksa a chak loh hlauvin eitur tui ber ber te min lei a. Tin, ka nu emaw, ka pa emaw hian kan exam dawn apiang hian lu chunga kut nghat leh nghat lohte pawhin min tawngtaisak ziah a, hei hi ka hlawhtlinna kawng min sial saktu ropui berte zing ami a ni.

I zirna atana i ṭhiante pawimawhna:
- Ka thiante pawh hi ka zirna kawngah an pawimawh em em a, mahni inrintawk lutuk loh chang pawhin keimahah rinna an nghat tlat a, min tawiawm thain min fuih nasa thin em em a ni.


A duhzawng leh ngainat zawngte:
Rawng - Sen no(pink)
Chawhmeh  - Dawl bai, iskut bai, bawngsa ruhkawl chhum han, artui, alu kan ,etc
Incheina - Incheina lam hi chu thil nu leh lutuk hi ka ha vak lo a, a bak chu ka mood a zir a nimai.
Rimawi – Tupac Shakur, Eminem, Aurora, The Beatles.
Mizo Ziaktu zingah - Mafaa Hauhnar
Hla- Life goes on(tupac), Real Love(The Beatles), etc
Hla phuahtu - (ka nei chiah lem lo)
Teacher - Teacher ngainat ber tihna a nih chuan kan teacher/lecturer te hi an fel em em vek a, hming hmera han sawi tur bik ka hrelo.
Leader - NIL

Mize ngainat zawng:
- Mahni nihna ang anga lang ngam, mi polite, fiamthu duh, nuih duh tak leh mi rilru tha, zuan zang tak te, mi tlawmngai.

Mize ngai nat loh zawng:
- Kawm apiang sawichhiatna tur nei thin, fiam dawl lo, mi nuna buai tak te.

Hobby: - Lem ziah leh zai.

Relationship status - single

Kawppui atan duhzawng:
- Ka chhung leh ha te vawng fai mi, lerh lo,  Thusawia ding mi, rilru nghet, fiamthu duh tak leh min hrethiamtu


Zawhna dang:::
1. A tel lova i awm theih loh: Pathian

2. I nun kaihruaitu: Pathian, Ka nu leh Pate

3. Hringnuna i hlauh ber: Nihna anga lan ngam loh

4. I tih ngai miah loh tur: Mipa kawng engkima inchawm tir. Mahni inchawm zawh hi ka tum bur mai😂

5. Mizo Tualzal nuna ṭha i tih: Tlawmngaihna

6.  Quote i duh ber: "Mihring rin ai chuan Lalpaa rinna nghah hi a tha zawk."

7. Mizoram leh Mizo tualzal nuna Mizo hmeichhiate dinhmun:
- Mizoramah hian Mizo hmeichhiate hian kawng hrang hrangah an rawn invawrh sangin mi tam tak zah rawn te an rawn ni tawh a, a lawmawm em em a, mahni inchawm zo hmeichhia hi an tam tawh em em bawk a ni. Chutih rualin Mizoramah chuan in chhung sekrek khawih hi hmeichhe tih tur chauha dahna hi chhungkaw tam zawk an la ni a, heti lamah hian hma kan la sawn a ngaiin ka hria a, hmeichhe hna bik hi a awm loh avangin hmeichhia chauh inchhunga che tura beiseina rilru hi dah bo a la ngai deuh.

8. Hnam hmingṭhat leh hmingchhiat kawngah Hmeichhiate'n mawhphurhna:
- Kan hnam kan tihhmingthat theih dan hmasa ber chu zahawm taka awm a ni a. Zahawm taka awm tih khan inhmuam up lam ni miah lovin nelawm tak siin mahni zahawmna hum tlat siin hnam dangte lakah kan hnam hmeichhiate hian kan chawimawi thei a ni.

9. Hnam ziarang chawinun kawnga Hmeichhiate mawhphurna:
- Kan hnam lam chi hrang hrang te hi 2-1 tal chu thiam ila. Tin, hei chu hmeichhia chauh nilovin mipaah pawh a applicable vek a, hmeichhia chauh hian Mizo hnam kan chawi nung thei lova, rual khai taka Mizo mipa leh hmeichhiate an tan rual a ngai a. Message-ah te kan tawng te hi hawrawp kimin chhu hram hram ila, kan tawng hi zahin ngaihlu zual ila, duhdah taka ziah hi ching lo ila, a chhan chu kan tawng a boral rual hian kan hnam a boral dawn a ni.

10. Mizote tan 'Fa neih tlem' inzirtir hi a ṭulin i hria em?
- Mizoteah chuan kan hnam kan la tam loh avangin 'Fa neih tlem' inzirtir hi a tul ka ti lem lo a. Amaherawhchu, chawm zawh loh ai chuan neih tam loh a tha ka ti thung.

11. Mizo hnam ṭhanmawh bawk nia i hriat?
- Social media kaltlangtea kan Mizo puite selna thu kan chhak chhuak awlsam lutuk te, mahni kea din tumna kan la nei tlem bawk a. Tin, midangte aia ti thei lo bik nia inhriatna kan neih thin te hi hmasawn kan mamawhna lai a ni.


12. Zirna, Khawtlang leh Kohhran hi?
- Zirna, Khawtlang leh Kohhrante hi zirlai nuna thil pawimawh tak a ni a, an vai khian an pawimawh dan a inang lo vek a, chuvangin sem zai thiam a ngai hle. Zirna lama sang vah mahse kohhran leh khawtlanga inhmang ngai lo chuan a nunah khawharna a nei ngei ngei dawn a. Mihring chu inmamawh tawn kan nih avangin Kohhran leh Khawtlanga inhmana midangte nena thil tih ho fo hi rilru hriselna atan a tha em em a ni.

13. Khawtlang, Kohhran leh nangmah:
- Kohhran leh Khawtlangah hian zirlai nih chuan a chuang a liama inhman hi a tul ber lo a, amaherawhchu kha chu a mihringa zir ni se. Keimah bikah chuan Kohhran leh khawtlangah hian a mawi tawk chuan ka inhmang ve a zirlai tibuai lo tur tawkin.

14. Social Media leh Nangmah:
- Social media hian keimahah thatna a neihte chu- Social media kaltlang hian ka nuam tih zawng te ka pho lang thei a, hmelhriat thar tam tak min neihtir bawk a, a tangkai em em a ni.

15. Mizoram ṭhalai tam tak tlakchham:
- Tumruhna, Rilru puitling.

16. Ngaihsan tur dik nia i hriat:
- Mi rinawm, a thil tih apianga taima taka ti thin mi, mi dik, mi taima.

17. Hlawhtlinna tura pawimawh:
- Tih hram hram, Mahni inthunun theihna(self discipline) leh Tum ruhna

18. Hloh i hlauh ber: Ka nihna

19. Hnam dang nupui pasal neih hi:
- Hei hi kan sawi zau deuh ang a. Tunlaiah a bikin Mizo hmeichhiaten dem an tawk nasa a, hnam dang neih hi hnam phatsanna, hnam tihboralna angah an ngai thin a. Mahse, Mizo hmeichhiain hnam dang pasal a neih hian a hnam a phatsan tihna a nih loh mai bakah hnam boralna hmawr a nilo tih hi hre thar leh ila. Pathian hmaah hian tu mai pawh hi ang khat vek kan ni a, ang khat vekin Pathian hian min hmangaih avangin hmangaihna avanga hnam dang nupui pasal neite hi keichuan demna tur ka nei lo. A Hmaa ka sawi tak angin hnam tiboral theitu chu kan hnam tawng duhdah taka kan hman thin zawknate hi a ni.


I thalaipuite tan fuihna--
- A hmasain, fel leh tha ka intih avanga sawi ni lovin, tu atan pawh a that ber avang zawka sawi ka ni a. Pathian hi kan nunah dah hmasa ber ila, a bak chu Pathian hian kan kawng tur chu a lo rel fel mai a ni. Tin, mahni inrintawk hi kawng engkimah a pawimawh em em a. Nangmah leh nangmah I inrin tawk loh chuan midangin an ring dawn lo hrim hrim che, hei vang hian mahni inrintawk hi thil awlsam tak ni lo mah se neih theih a ni a, a pawimawh em avang hian kan thil tihna engkimah hian mahni inringtawk ila, midang ngaihdan hi a tul hunah chuan I ngai pawimawh lo ngam ang u.

EXPLOREMIZORAM.COM i hmuh dan:
- A tha hle a, Mizorama hmun hrang hrang amiten an nuna an thiam zawng emaw, an hlawhtllinna emaw tarlanna kawnga tan latu an ni a, an pawimawhin chawimawi an phu hlein ka hria.


Founder/Editor
Explore Mizoram



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.) 

Post a Comment

3 Comments

  1. Ngaihnawm hle mai

    ReplyDelete
  2. hmelthat mai bakah lehkhathiam tel....a tawngkam a hman a puitling em em bawka....chhungkaw pangngai tak atanga ron chawrchhuak anih ngei ka ring...lehkha pawh hei aia nasa a atihthat chhoh zel beisei pui ang.

    ReplyDelete
  3. Ka naute hi chu ka duh reuh a nia, cute khat top

    ReplyDelete

He post chungchanga i ngaihdan lo sawi ve rawh: