MSU in Zofate inpumkhatna leh tanrualna lawmawm ti

Aizawl | November 5, 2020: Mizo Students' Union (MSU) General Headquarters, Aizawl chuan tunlai Inner Line Reserve Forest Area Mizoram chhunga buaina chungchanga khawvel hmun hrang hranga Zofate inpumkhatna leh tanrualna rawn langchhuak chu lawmawm an ti em em a. Ram hian ri nei mahse Hnam chuan ri a neilo tih a takin hmuh a ni chu MSU chuan thalaite rilru a beiseina thi theilo Mizoram thar Greater Mizoram hlawhtlinna a hlalo hle nia an ngaih thu thuchhuah siamin an tarlang.


MSU chuan Bangladesh atanga dan lova rawn pemlut Assam leh Mizoram inrina, Inner Line Reserve Forest Area - Mizoram a khawsa zuite'n chawl lova October ni 10 atanga vawiin thlenga buaina an siam reng chu a thinrimthlak a ti takzet a. Mizoram ei leh bar lakluhna pui ber National Highway te hial tharum hmanga an dang chat te, kan mi leh sa te state pawn a dan beh anni chu Hnam angin a thinrimthlak a ti takzet a ni. Hetih mek laia tlang hrang hrang Myanmar, Bangladesh, Manipur, Tripura leh Assam chhunga kan unaute'n Zofate Jerusalem Mizoram leh a chhunga chengte tana an inpekna, inhuamna, tha leh zung sen tawh zawng zawngah MSU chuan thlamuan thlak a tiin lawmthu a sawi tak meuh meuh a ni. Hun lokal zel turah MSU chuan Zofa kan unaute mamawhna kawngah kan hniak khat pawh a tawlh lovang tih khawvel hriatah a puang chhuak duh nghal a ni.

MSU chuan ramri a buaina chungchangah chawl lova Vairengte khawtlang inpekna a chhuang tak zet zet a, ram chhan nan Mizo thalai tha leh zung sengtu zawng zawngte chungah lawmthu a sawi bawk a ni. MSU chuan Mizoramin ramri a buaina kan tawh hrang hrangte hi a vil reng a, hemi kawnga min finchhuah turin kan inhawng reng a. Ramri hrula MSU chhungkua Kolasib District Headquarters, Mamit District Headquarters, Vairengte Headquarters, Zamuang Headquarters leh an hnuaia Sub-Headquarters leh Branch hruaitute, Hnam pual hrang hrang leh College Student's Union hruaitute pawh engtik hunah pawh che chhuak thei tura inralring turin a chah reng bawk a ni. Lu chhum ban chhum huama pipute lo sah zau kan ram chin humhalha venghim tur hian Zofate hi kan tangrual thap reng tih a taka rawn lang chhuakah hian kan sawrkar thuneitute pawhin rilru paukhauh zawka Hnam Hmangaihna thinlung nen ro an rel MSU chuan an beisei tak meuh meuh tih an tarlang a.

MSU chuan Covid-19 hrileng vanga zirlaite'n admission chungchanga harsatna kan tawh mekah Higher & Technical Education department changtu Minister Dr. Lalthangliana hmalakna chu lawmawm a ti takzet a. Zirlai tam zawkin admission an hmuh theihna tura Mizoram University leh College thuneitute inpekna ah Mizo zirlaite aiawhin MSU chuan lawmthu an sawi bawk a ni.

Post a Comment

0 Comments