MISS INDIA-A TEL THEIH DAN

A hunlai ni tawh lo mahse zawhna tam tak a awm avangin Miss India 2019 Suman Rao thusawi, Miss India 2020 a tel theih dan, telna state thlan dan leh audition pek dan a sawifiahna Mizo ṭawng a lehlin kan rawn chhawpchhuak e. A tawpah hian a original video link dah a ni.

“Crown hlu tak ka khum ni kha ‘Nimin’ ni mai khan ka la hria. Ka nunah zangkhua bungbuin, engkim hi a rawn danglam ta. Ka nu leh pate’n phur takin lawmna mittui nen, ka duhthusam a hlawhtling lai kha min thlir a. Aw…an hmel mawlh mai kha! Ka ṭhenrual ṭhate khan phur takin min lo au va. Hlim tak leh phur taka min selfie puitute leh thla latu chhiarsen loh te pawh kha sawi hmaih chi an ni lo. Mumang ram ang mai a ni a, kha hun kha ka ngaihlu takzet a ni.

Khai le! Tunah hian chutiang hunṭha i chan ve theihna hun ropui chu a rawn inher chhuak ta e. Femina Miss India co-powered by Saphora and Ropaso chuan a nghak che a. Chuan keimah ngei hian he hun ṭha i chan dan tur thuruk hi ka hrilh dawn che a ni. 

www.missindia.in-ah lo lut la, ‘apply now’ kha i hmet ang a. Chutichuan, i screen-ah khan registration form a lo lang ang, uluk takin i chhiar dawn nia. Tichuan, I fillup thei ang.

Thlalak pathum i upload a ngai dawn a, close-up, mid-length leh full-length, 5mb aia lian lovin.

I identity proof document thehluh tel a ngai dawn a. Chumi atan chuan passport emaw voters ID emaw, driving license te pawm an ni a. Chu chu India khua leh tui i ni tih finfiahna tur a ni. 

A dawtah chuan i state telna tur atan proof a ngai leh a. Hemi atana pawmte chu: - Birth certificate emaw passport emaw, i pianna state tarlanna atan. College ID (Student ID) leh residential certificate proof atan tho. Inluahna te lehkha emaw gas card emaw electric bill emaw kha i chen mekna state finfiahna atan i hmang thei bawk ang a. Tin, i nu leh pate document pawh pawm a ni.

A tawp berah chuan height certificate submit tel tur a ni a, doctor hnen aṭanga lakchhuah mai tur a ni. Chu chuan 5’3 ft emaw a aia sang i ni tih a fihfiah tur a ni. 

Thil ngai tam tak a awm tih chu ka hria; mahse, a chanve kan thleng tawh a nia.

Tunah chuan a hlimawm lam ve thung aw; Audition Rupaso-a thehluh dan tur. Tunlai hri leng mek avang hian Miss India hi virtual-a (online) neih a ni dawn a. Audition-ah hian video pathum Roposo app-ah i upload a ngai dawn a ni. Ramp walk video nalh tak, nangma chanchin fiah felfai taka i sawina, introduction video a ngai bawk ang a. A tawp berah i talent i pho lanna video.

(Hetah hian Roposo apps hman dan a sawifiah a, a tangkai rih loh avangin tawite kan let tel lo)

Tin, Form i fillup rual khan state pakhat aia tam aṭangin i tel thei a nih chuan i state tel duhna ber kha a hmasa berah i ziak ang a. Tikhan i tel theihna state zingah khan i duh dan indawtin i ziak tawh mai dawn a ni. Entirnan: State pathum aṭangin tel thei ta la, I duh dan indawt khan State hming kha i ziak dawn nia. A ṭul zawng zawng i fillup hnuah ‘terms and conditions’ tih i hmet ang a. Tichuan, ‘submit’ tih kha i hmet leh dawn nia.

Form fillup kim lote chu disqualified an nih dawn avangin uluk takin i endik leh thlap dawn nia. Ka thil sawi hi a fiah tawk ka beisei a, he hun ṭha hi mi tam takin in rawn bawhzui ngei ka beisei bawk.

I in lum aṭang ngei khan rawn tel ve la, ‘Miss India 2020’ niin Miss World-ah India ai rawn awh ve ta che.” 

Hetah hian Suman Rao-in a sawi lai video en turin click rawh.




Post a Comment

0 Comments