HARSATNA KARA LAWMNA HLU

_(Ka pa thihcham thla sawm-na pualin)_

[Remmuana Chawngthu]

*Sikni eng.*

Thu leh hla lama lungleng-mi leh kawng hrang hranga lunglen pe na thei takte tan chuan he sikni eng mawi lo zâm vel zet hi chu tawrh a har a, Lal pian hun boruak thawmin khawvel hmun tin a chiah chhuak vek tawh bawk nen. Thlasik boruak lunglenthlak tak lo thleng hmu thei tura kan nunna chak lo takte zuahsak kan la ni hi a va han lawmawm tak em!

Ram-ro rimawi kungpui an tih hial - Rokunga krismas hla chuam ten hmun tinah thawm a chhuah leh a, Siampuii Sailo leh Lalroutmawi te krismas hlain mual tin a hrut leh ta. Covid 19 hri leng huatthlala awm zet hi awm lo phei se la zawng, a va hlimawm leh dawn em!

*Home quarantine leh Covid test:*

Engnge maw ṭul thilah Lawngtlai district ka va rap ve zuai a; ka haw tükah intest ka tum laiin, kan veng VLFT ten test nghal mai an remtih loh avangin, ni thum leh zan thum zet chu kan inchhungah kan chhungkaw bikin kan inkhung ve a, a hrehawm ṭalh ṭalh ngei mai.

Nikhua kan hriat ve aṭanga tun thlengin inleng nei loa awm ṭha thiam lo hi kan ni ve deuh a, chhun zan zawm-a  inleng nei lo a kan awm hmasak ber kan tawng a. Keini'n hrehawm kan tih rualin kan ṭhenawm khaw vengte hlei hleiin hrehawm an ti emaw tih tur a ni. Kan kawngka zawnah an lo dak a, min rawn be hram hram zel tho. A ṭhenin chawhmeh min lo pe a, ṭhenawm ṭha nih tlin ve lem lo hian ṭhenawm ṭha hi kan lo ngah riau a, a va lawmawm em! 

Broiler ar ang mai a mahni inchhung chauh-a hun kan hman hnuah hri kai leh kai loh ka intest ve a, Pathian zarah NEGATIVE result ka nei hlauh mai, a va han lawmawm em! Thinlung lam hi a negative ve zel ang tih erawh a hlauhawm viau.

Kumin zet chu kan chhungkaw chhiat tawh kum hi a ni chiang leh lutuk a, kan ni deuh nuaih reng zel hi a ni ber e. Mahse, hrehawmna a lo thlen a, han buai ve nak nak hian hlimna a lo hnai ve leh vat ṭhin a, a va lawmawm ṭhin tak em! 

*"Sawm thah ni-ah vawi khat lungngaih a awm":* He Mizo thufing hi a dik khawp mai. Hringnunah hian hlimna leh lawmna, hlawhtlinna leh ropuina hrang hrangte hi han tawng ṭhin mah ila. Kan thlan leh kan beisei loh thil aṭanga hian lungngaihna leh manganna tur thil engnge maw tak hi rin loh kar takin, kan nunah a lo lut leh zeuh zel ṭhin a ni.

Kan hlim thawm ring tak mai, a reh fel hma hma hian han ngui bur theihna khawp thil hi tawn tur a lo awm leh tlat ṭhin a ni. Hei hi hringnun khawvel dik tak chu a ni. Hriatthiam leh lungawi kim vek erawh a va har ṭhin tehlul em!

Mahse, hringnun nihphung dik tak paltlangtute nun hi a va ropui ṭhin em! Tuna khawvelin hruaitu ropui tak tak a neihte leh mi hlawhtling tak tak a kawlte hringnun hi bihchian tak tak chuan, harsatna harsa zet mai lo tukdawl tawhtute an lo ni a, an chanchin chhinchiahtlak tak hi khawvelin a chhinchhiah a, a zirchiang fo zel chu a nih hi.

*Kum 1968 Olympic kha*: Hemi kum Olympic hi khawvelin a hre rei hle a ni. Hemi ṭum hian marathon intlansiaknaah Tanzania tlangval Joseph Stephen Akhwari chu a tlan ve a (Thusawitu dangten a kum hi an sawi sual fo, ṭhenkhat chuan Olympic neih loh kum te an sawi mai mai ṭhin a), an tlan ṭan chiah tihah a ke a bilh sual a, a tlan ṭha thei ta reng reng lo a.

 Mahse, harsa tak leh hrehawm ti takin a kal boh boh a, intihsiak programme a zawh tawh hnuah a va kal thleng ve hram a; mak an ti hle. _"Engtia khatia lo kal thleng nge i nih,lawmman lak a beiseiawm tawh chuang si lo a,"_ tia an zawhna chu, _"Kan ram (Tanzania)in lawmman dawng tur chauhin min tir lo a, a tawp tlan thleng turin min tir a ni."_ tiin a chhang a;a bikin lawmman an siamsak hial a ni. Chu mai ni lo, vawiin thlengin khawvelin a hria a ni.

Khawvel thilah pawh mi hlawhtling leh ropui nia inchher tur chuan harsatna leh hrehawmna tam tak paltlang a lo ngai fo mai tih hi kan hriat hnu vek a ni. Rawngbawlna leh Thlarau lam thilah hlei hlei hian a ni zual awm e. Lalpa hmantlak ni tur chuan thlemna leh fiahna, harsatna leh mangana thlipuiin a nuai hrep lai pawha chhel taka tuar a, hrehawmna tihrehawmtute bawk hi rawngbawlna kawngah pawh mi hlawhtling an lo ni leh ṭhin.

_(Sam 113:7) "Ani chuan rethei chu vaivut ata a kai tho thin a, Pachhia chu ekdur ata a chawi kang thin."_

Hrehawmna leh buaina min chhawk zangkhai a, manganna leh thlabarna kara kan nunna min chelh tlattu erawh chu kan LALPA ngei hi a ni. Thil chi tinreng hneh thei turin chakna thar min siam ṭhin a. Ani chuan mi hnuaihnung leh bakberh, mi chenbeh leh bawlhhlawhte pawh hmun ropui takah a hlang chhuak ṭhin a. Rilru mangangte hnenah thlamuanna kim pein, nun nei lote hnenah nunna hial pawh a lo pe thei a lo ni. Harsatna ruam thuk tak aṭanga lawmna tlanga min kai chhuak leh zel ṭhintu, kan Pathian i theihnghilh ngai lo ang u.