DIEGO MARADONA A AWM TA LO

Nov 26, 2020: Khawvel media lian zawng zawng tih theihin  November 25, 2020 India ram sanaa zan dar 10:00 bawr vela Argentina footballer ropui Diego Maradona thih thu an puang a.  Benavidez Veng Buenes Aires khawpui hmar lamah a inluahah lungphu chawlin a thi a ni. Maradona hi a thluaka thisen khang chu tun November 3 khan zai  a ni a, a dam chho viau  tawh a, vawiin lam khan lungphu chawl (heart attack) in  a awm phut a, a nunna an chhan  zo ta lo a ni. 





Maradona thih thu, thu lungchhiat thlak tak hi Argentina TV thu puangtu te chuan puan harsa an tiin, hnuk ulh țeuh leh mittui tla pur chungin an puang a. Argentina TV news channel C5N thu puangtu phei chuan "a thih hi ka lo ring phal ngai lo a, a thih theih pawh hi ka ring lo," a ti hial a ni. Argentina ram chuan ni thum an sun tur thu an puang chiang tawh a ni. 
Argentina president Alberto Ferńandez chuan, an ram national TV ah "vawiin hi ni duhawm lo tak a ni, Argentina mi zawng zawng tan lung ngaih ni a ni, Maradona ang midang hi kan hmuh leh pawh ka ring tawh lo" a ti.
Football khawvela hun a lo hmanpui tam takin an uithu an sawi a. Chung zingah chuan Pele chuan "ka țhian țha, mi ropui kan chan ta, a kalsan tak a chhungte tan ka țawngțaipui e, engtikah emaw chuan vanramah football kan petho leh ang", a ti. Johan Cruyff leh footballer mi ropui tam takin an uizia an sawi bawk. 
Diego Armando Maradona  hi October 30, 1960 ah Argentina khawpui Buenos Aires veng pakhat Lanus ah a piang a. A hun lai hian  football ah World record transfer history vawihnih siamin Boca Juniors ațanga Barcelona a luh khan £ 6 million a ni a, Barcelona ațanga Napali a luh hian  £ 6.9 million bawk a ni leh a ni. 
Feet 5 leh inches 5 chauha sang a ni a, heti chung hian palian 6 feet chuang te pawhin lu hmanga  ball vawrh pawh an tauh khalh thei chuang lo, pumrua lian lo ni mahse a țuan a rang a, a ball ken a nghet țha hle a, mi bum a thiam a, a khelhpuite _foul_ pek a thiam a, a team tan a țhat zawk dawn chuan a tlu der thiam hle a, tluk a țhat loh hunah erawh chuan tihtluk hleih theih a ni lo thung.
Vawiin hian thi mahse  football khawvela a sulhnu hnut chhiah erawh hi chu Khawvel awm chhungin sawi a ni tawh ang.
_Gracius par haber existido, Diego. Te vamos a extrañor toda la vida_.


The Guardian
November 25, 2020
12: 51 EST
===25==11==20==
Huna Kawlni Kawlvawm

Post a Comment

0 Comments