Kanhmun lei dawhthat hawng

Aizawl | November 24, 2020: Tripura atanga awlsam zawk a chak lak a nih theihna atana Mizoram Sorkar-in ‘Hnam Project’ tia a hming a vuah, Zamuang to Bairabi Road leh, Langkaih lui a Kanhmun Lei chak tawk tawh lo siam that leh thawm that hnathawh chu November ni 21, 2020 (Inrinni) khan mipui tan hman turin peih fel a ni ta. He mi ni vek hian Lei dawh siam that hna thawktu Mizoram PWD te buatsaihin Kanhmun a PWD Complex-ah Lei dawh zawh lawmna leh Pathian hnena lawmthu sawina hun hman a ni a. He hun hi Manpower Development Board Vice Chairman leh Aizawl West-I Bialtu MLA ni bawk Pu Zothantluanga (Valtea) chuan a hman pui.

He hun hmannaah hian Pu Valtea chuan thu sawiin, “Kan Chief Minister leh PWD Minister ni bawk Pu Zoramthanga’n a ngaihpawimawh em em, kan ram thenawm Assam nen buaina kan neih apianga kan inkal pawhna kawng min khar sak fo avanga buaina kan neih thin pumpelhna tur leh, chutiang hun a lo thleng leh a nih pawha ka buai tawh lohna tura Assam ni lo, kan thenawm State dang atanga bungrua kan lakluhna theihna tur kawng dang dap a, Langkaih lei dawh tha a siam tha tur a ruahmanna a siam leh, kan Chief Minister ngaihpawimawh ang ngei a, Department lam pawhin rim taka hna thawk a, hun reilote chhunga Lei dawh hna thawh zawh a ni ta mai hi Mizoram mipui te tan a lawmawm tak zet a ni” a ti a.

“He Lei dawh that hna a hiawhtlinna tura Department hmalakna te, NGO, Police te, VC leh khawtlang mipuite thawhrimna leh thahnemngaihna a ropui tak zet a. He Lei dawhna a thawktu zawng zawng te pawhin, Ram leh hnam hmangaihna nen, kan ram tana hnathawk kan ni tih rilru puin, rim tak leh thahnemngai taka hna kan thawh tlan avangin, chak tak leh rang tak, tha bawk siin hna pawh kan thawh zawh phah theih a ni tih a lang chiang hie.” a ti bawk.

Kanhmun Lei hi Metric ton 20 zo tur niin, a siam that hna hi kar thum chhung vel thawh a ni a. Kanhmun Lei Metric ton 20 dawl zo tura siam a nih avang hian Teirei lui Metric ton 15 dawl zo mek pawh ton 20 zq tura siam leh nghal tura ruahman a ni. 

- DIPR