LADC MDC Inthlanpui 2020 chuh turte an chiang ta; Chuh tur 72 awm dawn!

• LADC MDC Inthlanpui 2020 chuh turte an chiang ta.
• Chuh tuma hming pe lut 73 atangin 1 inhnukdawkin, candidate 72 an awm dawn.
• 
  

Aizawl | November 24, 2020: Kumin December ni 4-a Lai Autonomous District Council (LADC) hnuaia Member of District Council (MDC) Inthlanpui, 2020 buatsaih tura chuh tuma hming pek luh theih hun tawp November ni 20, 2020 (Zirtawpni) tlai dar 3 thleng khan constituency 25-ah hming pe lut mi 73 awmin, hming pek luh theih hun tawp ruala Returning Officer Dr Andrew H. Vanlaldika hova hming pek luhte endiknaah hnawl an awm lo va. 

Nimin tlai dar 4 thlenga inthlan chuh tuma hming pe lutte tana inhnuhdawh theihna hun hawnah 23-Sekulh MDC Constituency-a Independent-a chuh tuma hming pe lut Malsawma Bru chu inhnukdawkin, LADC Inthlanpui, 2020-ah hian chuhtu (candidate) 72 an awm dawn ta a ni.

Kumin December ni 4-a Lai Autonomous District Council (LADC) hnuaia Member of District Council (MDC) Inthlanpui buatsaih tura vote thlak nana hman tur Electronic Voting Machine (EVM)-te chu vawiin khan Lawngtlai DC Conference Hall-ah political party hrang hrang ai awhte awm laiin engineer-te'n an endik (first level check) a, inthlannaa hman tur chin chu lehkha pawtin thliar fel (randomise) nghal a ni.

Lawngtlai District Election Officer Dr Andrew H. Vanlaldika chuan EVM a that leh that loh chu uluk taka endik a tul thu sawiin, political party ai awhte'n a tha tih an pawmpui thlap hnuah chauh hman tlaka chhiar theih a nih thu a sawi a. Inthlan hunah thil fel lo a awm loh nan uluk taka enpui turin political party ai awhte chu a ngen nghal bawk.

LADC MDC Inthlanpui, 2020-ah hian Bharat Electronics Limited (BEL) siam M2 EVM hman a ni dawn a, EVM-ah hian control unit (inthlan buaipuitute hmeh tur) leh ballot unit (vote thlaktute vote thlakna tur) a awm a, VVPAT erawh hman tel a ni dawn lo thung.

Nimin khan Lawngtlai District-a EVM kawl lai 200 chu endik a ni a. LADC-a MDC Constituency 25-ah polling station 111 awmin, he inthlana hman tur EVM mamawh zat 111 bakah reserve tur leh training-naa hman tur 29, a zavaiin EVM 140 chu a hmanna tur constituency nen thliar fel nghal a ni a. He'ng EVM-te hmanna tur polling station theuh chu a thawh hnihnaah la thliar fel tur a ni.