Hunpui vuakvetah halpuah, halmawi, silai lem mu kap chhuak thei leh sky lantern khap dawn!

Aizawl | November 24, 2020: Nimin khan Home Minister Pu Lalchamliana hovin SAD Conference Hall, MINECO-ah meeting neih a ni a. Kan hmaa hunpui lo thleng turah halpuah, halmawi, silai lem mu kap chhuak thei leh sky lantern khap ni se tiin an rel.




Home Minister chuan COVID19 avangin kumin hi kum dang zawng aiin halpuah leh halmawi lam chi reng reng hal loh a pawimawh lehzual dawn, a ti a. COVID19 hian thawkna lama harsatna a thlen tel avangin boruak ti bawlhhlawh thei halpuah leh halmawi hal lo turin nasa lehzuala mipui inzirtir a tul, a ti.

Kum danga tih thin angin halpuah, halmawi leh silai lem mu kap chhuak thei chu khap ni se tiin meeting-ah hian rel a ni a. Sky lantern hian bengchheng leh khu siam lo mah se kang mei ti chhuak thei thil a nih avangin kumin atang chuan sky lantern pawh khap ni se tiin an rel bawk a ni.

Krismas leh kum thar vuakvetah police-ten check post siamin ngawrh taka beihpui thlak tum a ni a. Tlawmngai pawl YMA te bakah COVID-19 avanga din, tangkai taka hnathawk mektu Local Level Task Force-te nena thawh ho dan ngaihtuah tha an ti a. State pawn atanga heng thilte hi lak luh a nih lohna turin uluk taka lirthei te endik an nih dawn bakah online-a chah luh tum te danna turin Courier Company te chu hetiang thil chah an awm a nih chuan police-te hnenah hriattir (report) zel turin ngen ni se tiin an rel a ni.

District tin DC te chu khapna thupek tichhuak turin hriattir an ni dawn a. COVID-19 in nasa taka min chenchilh tawh avangin he natna inkaidarh tur ven nan leh a vei mekte himna turin halpuah, halmawi leh thil dang hal luih, lei, lak luh leh zawrh lakah mipuite inthiarfihlim turin Committee chuan mipuite a ngen a ni. 

Post a Comment

0 Comments