Hranghlui Zaithiam Zira Hnamte a herliam!

Aizawl | November 10, 2020: Mizo Zaithiam, hranghlui Pu Zira Hnamte chu tukin dar 5:30 vel khan a mu an kaitho zo lo a, damdawiin ah kalpui niin, dar 5:46 AM khan a boral niin thu dawn a ni.


Zira Hnamte tia kan lo hriat làr tak hi Hrangkaia Hnamte leh Pi Chalchani Chhakchhuak te fapa a ni a. A hming tak chu Zirkunga a ni a, a lo puitlin hnuah Zira Hnamte tiin kan lo hre lar ta  a ni.

April ni 23, 1951 khan Darzo khuaah a piang a. Lehkha thiam thei tak a ni a, lehkha a zir lai pawhin a thiam ber pawl a ni chho deuh reng țhin. Zai lama a làr mai bakah hla phuah lamah a inhmang hle bawk.

May ni 30, 1977 khan K. Rothangpuii nen an innei a, chumi hnu lam ațang chuan a chhangchhe ta deuh nge, hla pawh a phuah thar lutuk ta lo niin a lang.

Zai thiam a ni a, ama sak tur hla pawh a phuah chhuak thiam hle țhin. Kum 1979 Beat Contest-ah khan mahni hla phuah ngei sa thiam ber lawmman Buizova Trophy-ah Tape Recorder a dawng a. Zaithiam lawmman pathumnaah Radio-ah a dawng bawk. Kum 1980 Mizorama Beat Contest ah khan Mizo mipa zaithiam ber lawmman pakhatna atan Radio a dawng leh a ni.

A hla phuahte pawh a tunlai hlawm hle a, amaherawhchu belhchian a dăwl ang reng hle. Kum 1975 April thla ațangin All India Radio, Shillong-ah hla a khung țan a. A tirah hla pakua a khung a, a khung belh zel a, Aizawl lamah pawh radio nen hian an inkungkaih chho ta zel a, hla pawh a thun belh zel bawk.

Zira Hnamte leh a hlate tih lehkhabu R.L. Thanga Chawngthu in kum 1988 khan a tihchhuahsak a, chutah chuan hla tam tak a unau leh țhiante hla a chuang.

Kum 1974 Mizo Țhalfavang Kut (Shillong)-a ama hla ngei- Khiangawi Nuthai tih sain 2nd Prize a dawng a. Chuta țang chuan AIR Shillong-ah koh a hlawh nghal a, chutah chuan hla 9 lai a thun hman a ni.

Radio (AIR) ah hla 150 ațanga 200 inkar vel a thun tawh a, lawmman eng emaw zat a dawng tawh bawk.
Audio Album a siam tawh dan chu-
1. Lunglen - 1981
2. Ka lo hre ta - 1983
3. Rohlu ber Krista - 1984
4. Zan duhawm (Krismas) - 1984
5. Ka taksa leh ka nunna - 1987
6. I pianna ramah kir leh rawh - 1990
7. Nau chhiatna ram - 1997
8. Sudden Muanga - 2001

Post a Comment

He post chungchanga i ngaihdan lo sawi ve rawh:

Previous Post Next Post