Zofate Thlam sak chungchangah MZP in lawmthu sawi; ram humhalh tuma mipui inlungrualna hi MZP chuan hnam rohlu-ah a ngai - MZP

Aizawl | October 16, 2020: Assam sorkar mite'n Thinghlun ram thlam leh huan an rawn suasamna hmunah October ni 13-15 chhung khan MZP chuan thlam a sa tha leh a, Zofate Thlam tia vuah a ni a, thlam sak a nih theih nana theihtawp chhuahtute chungah MZP chuan lawmthu a sawi.

MZP chuan thuchhuah siamin, "Thinghlun rama thil duhawm lo a thlen chungchangah Zofa hmun hrang hranga mite tanrualna hi MZP chuan ropui a ti a, ram humhalh tuma mipui inlungrualna hi MZP chuan hnam rohlu-ah a ngai a ni," an ti.

Ram humhalh a nih theih nan Mizoram sorkarin theihtawp a chhuah a, Thinghlun rama thil thleng Mizoram sorkarin a chhanlet danah MZP chu a lawm a, Mizoram sorkar hruaitute chungah te, a hmuna duty 4th IR commandent leh police-te chungah leh sorkar hnathawk hrang hrangte chungah te MZP chuan lawmthu a sawi a, Hachhek bialtu MLA thahnemngaihnaah lawmthu a sawi bawk.
Thil duhawm lo thlenna hmunah Mizoram sorkarin police a dah nghal hi MZP chuan lawmawm a ti a, he hmuna duty police-te inpekna leh an huaisenna hi MZP chuan chhuanawm a tiin fakawm a ti a, chutih rual chuan vaihmite leh thosi kara rammute awmna hmun hi a hmun nuam lo tak a ni a, ruahin a tibuai bawk a, Mizoram sorkar hian ngaihsak se, a rang lamin ngaihtuah se tih hi MZP ngenna a ni.
Zofate Thlam saa MZP an hnatlan laiin ram venhim tumin Mizo sipaite'n an hmanruate chuhin tanhmun an siam fo a, sipai 'position' an la fo a, inring renga an awmzia leh an huaisenziate a hmuhin MZP chuan thlamuanthlak a ti a. October ni 15 khan MZP hnatlan laiin Assam atanga MLA rawn kal tum chu rawn thleng lovin a kir leh a, Mizo sipai inring renga an awm vanga kir leh a ni a, Assam lamin thlam sak chawlhsan leh MZP flag inzar pawhthlak an ngiat pawh Mizo sipaite'n tul an ti lo a, chutiang taka ram ven hna an thawh avang chuan MZP chuan lawmthu a sawi a ni.
Zofate Thlam sak nana sum thawhtute chungah leh tha thawhtu Langkaih group YMA, MZP Kolasib Headquarters, Mamit Headqurters leh Zawlnuam Headquarters hnuaia Sub-headquarters hrang hrangte chungah thinlung takin lawmthu a sawi nawn leh a, Zofate Thlam him taka a din reng theihna'n leh avenhim hna pawh thawkho zel turin MZP chuan Mizo mipui leh thalaite an sawm nghal bawk.