Aizawl | October 16, 2020: Vawiin October ni 16, 2020 (zirtawpni) zing dar 10:00 khan AMC leh National Urban Health Mission bultumin, ni 5 chhung awh tur Aizawl khawpui huam chhung AMC hnuaia faina kawnga hnathawktu hrang hrangte tana buatsaih, Screening & Health Check Up of Sanitation Workers chu AMC Auditorium, Thuampui-ah tan a ni.
He Health Check-up hawnna inkhawm tawi hi Pu Ralthuama Ralte, Town Planner, AMC in a kaihruai a. Hemi hnu hian hun hmanpuitu Dr.F.Lallianhlira, Principal Director, H&FW hnen atangin thusawi ngaihthlak a ni a. Ani bakah hian Dr.Lalchhuanawma, State Nodal Officer, OA. CP chuan faina kawnga hnathawktu kalkhawmte hnenah COVID-19 chungchang zirtirna a pe bawk.
He huna thusawitu Dr.F.Lallianhlira chuan National Urban Health Mission leh AMC tangkawpin faina kawnga hnathawktute hriselna ngaih pawimawh nachang an hria chu lawmawm a tih thu a sawi a. Mipui faina kawnga thawktute chu mi pawimawh berte zinga mi an nih avangin an hriselna hi ngaihthah thiang a nih loh thu a sawi. Dr.F.Lallianhlira chuan "COVID-19 avanga ram pum kan buai lai hian he hri leng mek hi awmze neia kan do a, kan nunpui thiam a ngai a. A veite thinhrik leh hleihluaka hlauhna hi kan bansan a hun a ni," a ti bawk.
Vawiina Health Check-up neihah hian Aizawl Khawpui huamchhunga bawlhhlawh paihtu te, zing kar hmun phiat te leh AMC hnuaia faina kawnga hnathawktu mi 60 bawr vel hriselna endiksak an ni a. COVID-19, Hepatitis B&C, HIV, Blood Sugar, Typhoid, Scrub Typhus, VDRL leh Urine test neih a ni. He hunah hian ITI, Zemabawk leh Sihphir Urban PHC atanga thawktu mi 14 ten hriselna endik hna hi an kalpui a ni.
He Health Check-up hi October ni 20 thleng neih tur a ni anga, Tuirial Dumping Ground-a thawktute zawng zawng pawh endik tel vek tura tih an ni bawk.
Post a Comment
He post chungchanga i ngaihdan lo sawi ve rawh: