Zofate Hnam lungphun zirhona nei

Aizawl | October 16, 2020: Vawiin khan Zofate Hnam Lungphun Zirhona chu Aijal Club ah Zoram Thar Zofate Lairelna buatsaihin neih a ni. He Seminar ah hian Mizoram political party aiawh te, Hnam aiawh hrang hrang te,  Pawl (NGO) aiawh leh chanchin chhuimi mithiam (Historian) te pawh an tel.




Seminar hi Zoram Thar Zofate Lairelna ziaktu Lian Nl. Lalruatfeli Hlawndo in a kaihruai a. Hnam inpumkhatna atana tawngtai rualna te an nei a. Tv C. Lalremruatan "Pathian thil rel dan chu" tih hla a sak hnuin Seminar thupui sawitu Rev. Dr. Zaichhawna Hlawndo in Zofate Hnam Lungphun a dawn dan te a sawi a. Hnam Lungphun innghahna bul chu Lal Isua Krista Kross Thuthlungah a in nghat a. Hnambote kan in hmuhchhuah tawh dawn avangin kum tam tak hnam hrang hranga ramdang leh hnam dang ten min thendarhna hi a tawp tawh dawn a ni a ti. Hnam hruikhat kan vawn tur thu hi kan ram zawlneite pawhin kum tam tak kalta khan an lo sawi lawk vek tawh a ni a ti bawk.

He Lungphun hi Zofate hnam lungphun tur a nih angin Zoram Thar chuan neitu chan chang bik tum lovin Zofate zawng zawng chuan a neitu chan chan vek a pawimawh dawn a ni tihte pawh an sawi.  

Kalkhawmten hmalakna hi an thlawp a, tha an tiin an lawm thu an sawi. Kan nihna party, pawl leh Kohhran te dahthain Lalpa tan hnam dingchhuak tur kan nihnaah inpumkhat a pawimawh zia an sawi bawk. 

Lalpan he Zofate hnam Lungphun ah hian Zova fate/thlahte hming zawng zawng ziahlan vek a ni dawn a. Khawvel hriatah thlah khat leh hnam khat kan nih puanna tur a ni dawn a ni a ti bawk. Zofaten hnam lung kan phun zawhah kan zavaia ta tur  Zofate Biakinpui pawh sak zui a ni ang a ti bawk.

Post a Comment

0 Comments