Oct 16, 2020 Friday: PTI in a report danin India chuan Myanmar hnenah tui hnuai lawng tuna a hman lai mek INS Sindhuvir chu Myanmar Navy hman turin a hlan dawn. Myanmar hnenah hian India hian a hralh dawn nge, a pekin a pe dawn tih official thu hian a tar lang lo. Myanmar ramin indona leh tuipuia hmelma ral venna atan țangkai tak tui hnuai lawng a neih hmasak ber tur a ni. India leh Myanmar ram pahnihte ram venhimna lama thawh dunna (military cooperation) țha zawk neih hi China ram inluling leh huangtau zel tur dodalna tur a ni.
Ministry of External Affairs chuan, he thu hi India ram Foreign Secretary Harsh Shringla leh Army Chief Gen MM Naravane te Myanmar rama zin lo haw hnuin a puang.
“Tuipui lama venhimna hna leh thawh dunna Myanmar ram nena kan neih hi kan thawhdunna zau tak zinga mi a ni," tih thu Anurag Srivastava, Spokesperson of Ministry of External Affairs (MEA)chuan Ningani tlai tawh takah khan a sawi.
“India hian tui hnuai lawng (kilo class submarine) INS Sindhuvir chu Myanmar Navy hnenah a hlan dawn a ni. Myanmar Navy ten tui hnuai lawng an neih hmasak ber tur a ni, ” tih thu Anurag Srivastava chuan a sawi.
Hei hi, helai ram bial himna tura kan hma thlir SAGAR (Security and Growth for All in the Region) chi khat a nih mai bakah, țhenawm ram te tan kan inpekna leh India ram tual chher ngei mai țhenawm ram ten an chhawr țangkai thei tur hi mahnia innghat ram kan nih entirna kawng pawimawh tak a ni, MEA thu chhuah chuan a tar lang tel a ni.
Myanmar hnena hlan tur INS Sindhuvir hi Hindustan Shipyard Limited ten nikum maia an chei țhat leh an thuam changtlun belh, Indian Navy kuta an hlan a ni. Indian Navy fleet zinga 10 Kilo class submarine zinga mi a ni. India tui hnuai lawng INS Sindurakshak erawhchu kum 2013 kum khan a chhunga kangmei chhuak avangin a chhiat bakah hluihlawn a ni tawh.
Indian Navy te hian tunah hian Myanmar Navy te hi kawng hrang hrangin zirtirna (training) an neihpui mek a, India leh Myanmar sipai thawhdunna ( military cooperation) ang leh ram ințhian țha annih vang a ni.
“He lawng (INS Sindhuvir) hi Indian Navy in tuna a hman mek, ralthuam tun lai ber ber, paipawn leh thiamna sang tak chuktuak khawm hmanga thuam a ni,” tih official chuan a sawi.
Bangladesh hian China hnen ațangin an tui hnuai lawng hlui pahnih a lo lei chhawng tawh a, Beijing hian hetiang tho hian Myanmar hnenah pawh lei ve turin a lo nawr tawh țhin a ni.
*Cooperation in Sitwe port*
India hian Myanmar ramah hian Sitwe port sak hna a thawk a, hei hi Kaladan transport project zinga pakhat a ni.
He inkalpawhna project hian Kolkata leh Sitwe lawng hmanga a thlun zawm dawn mai bakah khawmual kawngpui țhain Mizoram paltlangin a zawm bawk ang. North East State tan bik inkalpawhna kawng thar a hawn dawn mai bakah, Siliguri ar nghawng ang mai kawng kual zawh ngai lo a, Mizoram kal tlang hian Kolkata hlatna chu kilometer sang dawn laiin a hnai zawk dawn a, kawng kal hun chhung ni li emaw lai a hlep theih dawn bawk a ni.
Paletwa ațanga Zorinpui hi 109 km a hla a ni a, Zorinpui ațanga Lawngtlai hi 87 km a hla a ni thung, kawng laih hna hi 90% dawn lai zawh a ni tawh bawk.
Government of India chuan Kaladan Multi Modal Project leh Sitwe port te hi kum thar 2021 kum bul lamah hman theih tura hawn hman ngei a tum ruh hle a, he kawng hi hawn anih ngat chuan chhim lam kawt chhuah hi rang takin a pawimawh nghal ngei ang.
China ram pawh hian Sitwe bul hnaiah hian Kyaukpyu port a sïam ve mek bawk a ni.
He project tih țhuanawp hi Myanmar ram chhunga hel pawh Arakan Army te hian China puihnain an tum hle a. Mahse India leh Myanmar sipai te chuan hman deuh khan beihpui an thlak chiam tawh a. (Mizoram chhim lamah Indian Army an luh chiam kha).
Arakan Army te hian Mizoram hrul velah awm hmun an khuar thar hle ni a hriat a ni a, hei hi ram pahnihte tan enliam mai chi a ni lo ang .
SAWI BELHNA
Arakan Army te hian Mizoram leh Sitwe port inkar ramhnuai pilril lai, Mizoram lam hnaih tak leh Kaladan project chhehvelah hian he project tih sukuk tum hian țan hmun an khuar leh ngei nia hriat a ni a, India leh Myanmar army te hian phindarh hna (joint operation) an thawk nawn leh anih pawhin, joint operation thawh khatna ang khan, mipui ti ralkhel leh ti chiai tura rin thil thu vawrh darh leh chiam chin tawh loh atan a țha ang.
Source :
India Today
October 15, 2020
20:37 IST
===16==10==20==
Post a Comment
He post chungchanga i ngaihdan lo sawi ve rawh: