RAMRI CHUNGCHANGAH MIZORAM SORKAR A TLANCHHIA- ZPM; ZPM-IN MZP THLÂWP

Aizawl | October 16, 2020: Mizoram humhalhna kawnga huaisen taka hma la ṭhin leh tlanchhe ngai lo MZP-in ramri humhalhna atana hnatlang koa Thinghlun daia Pu John Zolawma thlâm an sa ṭha leh hi ZPM chuan fakawm an tiin an thlawp tlat tih nimin khan ZPM chuan thuchhuah siamin an tarlang.

Mizoram sorkar Press Release No.6080/2020-2021 Dated Mamit, 14th October, 2020-in a tarlan danin Dt. 9.10.2020 (Zirtawpni)-a Mamit District Thinghlun khaw daia Pu John Zolawma thlâm hâl leh a kaihhnawih Ramri chungchangah Dt.14.10.2020 (Nilaini) khan Karimganj DC leh Mamit DC te chu Mamit District-a Kanhmun khuaah meeting an neih thu leh he meeting-a DC pahnihte thusawi hetiang hian a târlang a.

"Mamit District Bawrhsap hian Thinghlun khua-a thil duhawm lo thlentirtute chu man chhuak a, action la ngei tura a phut thu sawiin thil thlenna hmun hi hmanlai kan pi leh pute aṭanga mahni ta anga kan lo cheibawl ṭhin, huan lo ram thlenga kan neih ṭhinna anih avangin hun lokal zel turah pawh a hma anga neih chhunzawm reng theih an inbeisei thu a sawi."

"Anbamuthan MP, Karimganj DC pawhin thil duhawm lo thleng chu pawi a tih thu sawiin chutihrualin thil thlenna hmun chu Singla Forest Reserve hnuai a awm, Karimganj District chhung ami anih avangin an thuneihna zahsak turin Mizoram lam Officials-te chu a ngên a ni."

He meeting-ah hian Assam sorkar aiawh, Karimganj DC-in Thinghlun khaw ram chu '...Singla Forest Reserve hnuaia awm, Karimganj District chhûng ami...' tia huai taka dawt a sawi ngam laiin Mizoram sorkar aiawh Mamit DC chuan, '...hmânlai kan pi leh pute aṭanga mahni ta anga kan lo cheibawl ṭhin, huan lo ram thlenga kan neih ṭhinna anih avangin hun lokal zêl tûrah pawh a hma anga neih chhunzawm reng theih an inbeisei...' tih thu a sawi ta mai hi Thinghlun khaw ram chu Mizoram chhung ngei a nih thu huai taka ṭang ngam lova, 'kan pi leh pute aṭanga ta anga kan lo en ṭhin' ang leka Mizoram sorkarin a lo ngai hi ZPM chuan lungchhiat thlak an ti hle tuih nimina an thuchhuah-ah an tarlang.

 

Hei mai ni lovin Pu John Zolawma thlâm Assam lamin an rawn hâl tâk bul maia Thinghlun VLTF duty-na bûk chu Assam lamin an ram chhung anga chhâl a, an rawn ngaimawh avanga 'Mizoram sorkar  thupêk ngeia hâl' a nih avangin Mizoram sorkar chuan mahni ram chin a humhalh ngam lova a tlanchhiat tâk avangin Assam lam pawh hi rawn pâwngpawrh a, a bula Pu John Zolawma thlâm pawh hi rawn hâl ni ngeiin ZPM chuan an ngai a ni.

Post a Comment

0 Comments