Mizoram State Cancer Institute tan MLA Ngunlianchunga'n Lirthei hlan

 'Zemabawk Cancer Hospital pantu damlo ṭhenkhat khawsak harsa tak tak ten Civil Hospital, Aizawlah CT Scan leh MIR tih ngai te tan veivahna lamah harsatna an tawh nasat thin avangin chung damlo te tana hman tur atan chuan an veivahna tur lirthei hi pe ka ni'- Pu Ngunlianchunga MLA (Lawngtlai West)

Aizawl | October 16, 2020: October ni 15, 2020 (Ningani) khan Lawngtlai West bialtu MLA Pu C. Ngunlianchunga chuan a MLA Fund hmangin Mizoram State Cancer Institute, Zembawk in a tul a pianga  hman tur lirthei ( Van motor) a pe. 

Lirthei hlanna inkhawm tawi neiah Pu C. Ngunlianchunga chuan kum 2017 khan Cancer natnain a tlakbuak tawh thu sawiin, phai lamah theihtawpa a in enkawl hnuah Pathian tihdamna a chan thu leh Cancer natnain a tlakbuak te dinhmun a taka  tawng tawhtu a nih thu a sawi. Mizoram chhung hmun hrang hrang leh ram pawn aṭang pawha Cancer Hospital, Zemabawk pawimawhzia leh Hospital pantu damlo ṭhenkhat khawsak harsa tak tak ten Civil Hospital, Aizawlah CT Scan leh MIR tih ngai te tan veivahna lamah harsatna an tawh nasat thin avangin chung damlo te tana hman tur atan chuan an veivahna tur lirthei a pe a ni, tih a sawi.

 

Pu C. Ngunlianchunga chuan, Hospital tan lirthei (motor) pek chu politics-a thangṭhat laktum vang a nih loh thu leh MLA Fund chu mahni bial chhunga hman tur nimahse, Cancer natna tuar mek tuna Cancer Hospital pantute tan bial bial a awm thei lova, natna tuartu leh thlabara awm te harsatna sutkian a duh vang a ni tih sawiin, a thilpek chu thil ropui tak leh man to tak ni lo mahse natna tuara mangang, miharsate tan malsawmna a nih ngei a beisei thu a sawi bawk.  

Cancer Hospital tana Pu C. Ngunlianchunga pek lirthei (Mobile Van) hlanna inkhawm tawi neih hi Director Dr. Zoramthanga'n kaihruaiin, Rev. Rammawipuia, Hospital Chaplain-in hunserh a hmang a ni.

Post a Comment

0 Comments