Aizawl | October 12, 2020: BJP Mizoram Pradesh chuan Dt.09.10.2020 (Friday) a Thinghlun khua a Pu John Zolawma Thlam Assam Police ten an hal chhiatsak leh a huan thlai engemaw zat tih chhiatsak a ni chu an dem hle a, Assam Sorkar hian he chhiatna avanga a sum hloh zawng zawng phu tawk ang hi pe let turin an phut bawk a ni.
BJP Mizoram chuan, "Assam Sorkar in heti taka min zuam leh an duh hun hun a Mizoram chhunga lo lut a, kan mi te thlam leh huan an suasam thin chu BJP Mizoram Pradesh chuan kan duhlo tak zet a, kan mite thlabar a an siam thin chu pawi kan tiin, a tlawm thlak hle ah kan ngai a, Mizoram chu enkawltu neilo ang hial a, a awm chu a zahthlak kan ti hle a ni." an ti.
BJP Mizoram chuan an thuchhuah-ah chuan, "Kanhmun OC ho a, Thinghlun Khua a Assam mite do let tur a kan Mizoram Police te chetdan erawh fakawm kan ti. Mizoram Sorkar hian tlanchhe chungin Ramri hi veng tawh lo se tih chu BJP Mizoram Pradesh chuan kan ngaihdan a ni a, Kum 2019 a NEDA Meeting na ah Union Home Minister Pu Amit Shah chuan Ramri buaina reng reng chu State Pahnih CM te inbiak remna a neih tur anih thu a sawi chu, vawiin thlenga Mizoram Chief Minister in hma ala lo chu amak kan tiin, Ramri chungchang hi kan Chief Minister Pu Zoramthanga hian angai pawimawh lo hle ah kan ngai a ni." an ti.
Mizoram himna tur anih chuan kan tanrual angai a, Pathian leh Mipui te zara Sorkarna kan chang a nih ngat chuan, "Kan Ram neih chhun venghim a, Kan mite thlavang hauh tur hian eng hunah pawh kan tlanchhe dawn lova, 'Eng hmanrua pawh hman a tul anih chuan keini chuan kan hmang dawn a ni tih chu Mizoram mipui te hriat ah kan sawi duh a ni an ti bawk.
Ramri buaina chungchang hriat anih veleh hian BJP Mizoram President Pu Vanlalhmuaka chuan Central hotute hnen a thlen nghal bawk a ni.
Post a Comment
He post chungchanga i ngaihdan lo sawi ve rawh: