Health Secretary in Darlawn PHC Tlawh

Aizawl | October 16, 2020: Vawiin October ni 16, 2020 (zirtawpni) khan Pu H.Lalengmawia IAS, Health Secretary chuan Darlawn PHC Building sak lai mek a hmunah kalin a enfiah.

Health Secretary Pu H.Lalengmawia, IAS hi Darlawn Dr.JH Vanlalnunmawia, MO Darlawn PHC leh thawktute bawkah COVID-19 dona kawnga Volunteers ten an lo dawngsawng a.  Darlawn CCC hmunah Village Level task Force leh health Officials te nen inkawmhona hun tha tak an hmang a ni.
Secretary chuan Darlawn PHC chu khawtual mai bakah  a chhehvel atanga pantu tam tak nei a nih avangin sawrkar pawhin a ngai pawimawh em em a. Theih tawp chhuah a  tih changtlun chhoh zel pawh a tum a ni a ti.
Kan tunlai hrileng chungchang pawh sawi langin COVID-19 dona kawnga Darlawn tlangdung inpekna chu lawmawm a tih thu sawiin lungrual taka ke penho zel turin a chah a. Health Department thawktute nena inpawhna tha tak nei zel tura a duh thu a sawi a. Harsatna an neihte pawh inthlahrung hauh lova sawrkar hnena thlen zel tura a duh thu sawiin an lakah sawrkar pawh a inhawn reng thu a sawi bawk.
Health Secretary hi vawiinah vek Aizawl-ah kir lehin Khawruhlian PHC thawktute mamawh a enpui leh nghal bawk a ni.
Pu H.Lalengmawia hi Dr.LP Malsawma Senior Medical Officer leh Pu Francis Zothanpuia JE ten an tawiawm a ni.

Post a Comment

0 Comments